Саха сиригэр Өлүөнэ өрүс ыам ыйын 9-12 күннэрин эргин хамсыан сөп. Билигин муус Иркутскай уобалаһыгар уста сытар. Ол туһунан Гидромет-киин Саха сиринээҕи салаатын үлэһитэ Татьяна Маршалик “Саха информационнай ааҕыныстыбаҕа” кэпсээбит.
Кини этэринэн, өрөспүүбүлүкэ улахан өрүстэрэ билиҥҥитэ хамсаабакка турар буоллахтарына, кыра уонна орто өрүстэр номнуо баран эрэллэр. Холобур, Тээнэ, Өлүөхүмэ уонна Амма бастара устубуттар. Амма үс күнүнэн Таатта Харбалааҕар кэлэрэ күүтүллэр. Ону таһынан, бэҕэһээ-бүгүн Бүлүү уута эбиллибит. Ордук Сунтаар Кириэстээҕиттэн саҕалаан Ньурбаҕа диэри.
Татьяна Маршалик итиннэ даҕата кэпсээбитинэн, бу күннэргэ Саха сиригэр Карскай байҕалтан циклоннар кэлиэхтээхтэр. Онон ыам ыйын 9 күнүгэр диэри халлаан ичигэс туруоҕа. Онтон 10 уонна 11 чыыһылаларга тыал уларыйыаҕа, халлаан арыый тымныйыаҕа.
Өрүстэр туруктарын бу сигэнэн киирэн онлайн-камераларынан көрүөххүтүн сөп.
