Бэс ыйын 3 күнүнээҕи туругунан, Саха сиригэр клещ 158 киһини ытырда. Онтон 19 үөнэ Арассыыйа атын эрэгийиэннэриттэн “олорсон” кэлбит – Тюменьтэн, Амыр, Кемерова уобаластарыттан, Приморье, Забайкалье, Хабаровскай кыраайдартан, Москубаттан уонна Бүрээтийэттэн. Ол туһунан Роспотребнадзор иһитиннэрэр.
Саамай элбэх киһини клещ Ленскэйгэ ытырбыт – 76 киһини. Өлүөхүмэҕэ – 31, Алдаҥҥа – 24, Нерюнгрига – 11, Дьокуускайга – 9 түгэн бэлиэтэммит. Биирдиилээн дьон Кэбээйигэ, Мэҥэ Хаҥаласка, Мииринэйгэ, Сунтаарга, Уус Майдаҕа, Хаҥаласка уонна Чурапчыга ытыртарбыт.
Быйыл сыл саҕаланыаҕыттан барыта 10 767 киһи, ол иһигэр 1779 оҕо, клеһи утары быһыыны ылбыт. Саха сиригэр уопсайа 10 тыһыынчаттан тахса гаа иэннээх дьон-сэргэ сылдьар сирин, оҕо лааҕырдарын клещ эминэн эмтээбиттэр.
