1987 сыл төрүөх Саха сирин олохтооҕо эр киһи аан бастакытын Арассыыйа гражданина буолары туоһулуур пааспары ылла. Ол туһунан СӨ Киһи быраабыгар боломуочунайын пресс-сулууспата суруйар.
Биэдэмистибэ этэринэн, эр киһи өссө 13 сааһыгар дьиэтиттэн биир докумуону ылбакка турар бэйэтэ тахсан барбыт уонна бу ааспыт 26 сыл устата ханна да дьиҥ таһымнаахтык бэлиэтэммэккэ, судаарыстыба өҥөтүнэн туһаммакка олорбут, быстах-остох үлэлии сылдьыбыт. Бэл, оҕолонон баран аҕа буоларын кыайан туоһулаабатах.
Биир кэмҥэ докумуонун оҥорторо сатаабыт эрээри, төрөөбүт туһунан туоһуну (сибэдиэтэлистибэ) ыларга муҥ саатар пааспар дубликата, оттон пааспары ыларга, төттөрүтүн, төрөөбүт туһунан туоһу ирдэнэр эбит. Инньэ гынан кыайан ылбатах.
“Быйыл эр киһи ЗАГС-тан төрөөбүтүн туһунан сибидиэнньэни дьэ ылбыта. Ол гынан баран, ким буоларын өссө биргэтэр туһугар, пааспар биэриитин онуоха-маныаха диэри тохтоппуттара”, – диэн боломуочунай аппараата суруйар.
Дьыалаҕа Киһи быраабыгар боломуочунай кыттыспытын кэннэ, эр киһи биир ыйынан, ол эбэтэр 39 сааһыгар, олоҕор бастакы пааспарын дьэ ылбыт.
