2026 сыл бастакы аҥаарынааҕы сурутуу түмүгүнэн, саамай көхтөөх сурутааччылар Өлүөхүмэ куоратыгар олороллор эбит. Ол туһунан “Арассыыйа почтата” суруйар.
Ол курдук, сыл бастакы аҥаарыгар Өлүөхүмэҕэ 1 000 киһиэхэ барыта 80 кэмпилиэк хаһыаты-сурунаалы суруппуттар. Иккис миэстэҕэ Ытык Күөл бөһүөлэгэ тахсыбыт. Онно 1 000 киһиэхэ барыта 65 таһаарыы сурутуллубут. Үһүс Сунтаар бөһүөлэгэ буолбут – 1 000 киһиэхэ 54 таһаарыы.
Сыл бастакы аҥаарыгар саамай элбэх ахсаанынан сурутуллубт хаһыаттар ортолоругар “Кыым”, “Саха сирэ” уонна “Забота-Арчы” киирбиттэр.
Дьон хото сурутар таһаарыыларын ортотугар улуус хаһыаттара кырата суох миэстэни ылаллар. Элбэх сурутааччылаахтарга маннык таһаарыылар бааллар: “Олекма” (Өлүөхүмэ), “Сунтаар сонуннара” (Сунтаар), “Үлэ күүһэ” (Горнай), “Олох суола” (Бүлүү) хаһыаттар, “Чуораанчык” уонна “Колокольчик+” сурунааллар.
Кэлиҥҥи сылларга өрөспүүбүлүкэ олохтоохторо саайт уонна мобильнай сыһарыы көмөтүн хото туһаммыттар. Ол курдук, ааспыт сыл от ыйыттан ахсынньытыгар диэри ааҕааччылар хаһыаты-сурунаалы онлайн ньыманан 18 804 төгүл суруппуттар.
Бэй.кэр.
