Элбэх киһи Ытык эбэбитигэр Сайсарыга Үрүҥ Тунах кэмигэр Күнү көрсүөн баҕарара чахчы. Быйыл сайын саҕаланыыта "Кыым" суруналыыһа Владимир Степанов: “Бэс ыйын 20-тэн 21-рэ -- Ыһыах күнэ үүнэр түүнүгэр, Сайсары Эбэҕэ былыр Сиинэ хайатын тааһыгар ойууламмыт өбүгэлэрбит күнү көрсөр үгэстэрин туомун -- Айыы суола күн уотун суһума буолан, илин саҕахтан уу устун толбоннуран кэлэн киһиэхэ алгыс күүстээх эниэргийэтин иҥэриитин сөргүтэн көрүөххэ сөп этэ”, -- диэбитин, санаабар ылына истибитим.
Ким алгыы кэлиэн сөбүн ыйыталаспытым -- бу кэмҥэ алгысчыттар бука бары ыҥырыыга сылдьар буолан, кыайан кэлэр кыахтара суох эбит. Айылҕатынан дьоҕурдаах билэр киһибэр эрийдим. Аны киһи дьиктиргиэх, ол киһим оруобуна, мин эрийэр кэммэр, Сайсары Эбэ аттыгар турар “Ытык Кэрэх Маска” хараҕа хатанан, тохтоон турар эбит. Кини: "Бу элбэҕи кэпсиир бэлиэ турар. Эбэбит тыынын иһиллээтим, кыһынын утуйар уутун уйгуурдар тыастан-уустан санаарҕыыр эбит", -- диэтэ. Мин киниттэн билэр алгысчыттарын ыйыттым. Ону киһим: "Тоҕо бэйэҥ туому толорууну ылыммаккыный, бэйэҥ сахалыы эйгэ иһигэр сылдьаҕын дии", -- диэтэ. Онно эбии ыйдааҕы туомнары ыытарга ис санаатыттан көмөлөһөр дьүөгэм "биһиги эн ыытар үлэҕин куруук өйүүбүт" диэн, санаабын бөҕөргөппүтэ. Күнү көрсөр күммүт иннинэ, ойууммут эбэҕэ ыҥыран көҥүл ылбыта. Бэлэмнэнэр үлэбитигэр Тэрчи, Л.В. Федорова, Лэгэн Лэгэнтэй сүбэ-соргу буолбуттара.
Алгыс ылар, былыргы туому толоруу түүнүгэр элбэх киһи тоҕуоруста. Бары сырдык, ыраас санааларынан салайтаран кэлбиттэр. Халлааммыт кыра былыттаах да буоллар, тахсыбыт күммүт уотун суһума сүүрэн кэлэрин көрдүбүт. Сайсары Эбэҕэ сиэри-туому ыытарга Сима Толстякова, Зинаида Григорьева, Валерий Васильев бэйэлэрин санааларынан салайтаран көмөлөстүлэр. Мустубут дьон ис сүрэхпититтэн Аан Алахчыҥҥа, сирбит-дойдубут Иччилэригэр, Үрдүк Айыыларбытыгар, Үрүҥ Күммүтүгэр сүгүрүйбүппүт. Ытык Эбэҕэ ытыктабылбытын, махталбытын, тапталбытын тиэрдибиппит.
Эбэ холку тыынынан угуттаабытын биллэрбитэ. Биир айылҕаны сибикилиир Хотун дьахтар кэлэн манныгы эттэ: «Эбэбит долгуна биһиги диэки налыйан кэлэн, ийэ оҕолорун таптаан харыстыырын курдук мүчүк гынан үөрбүтүн көрдөрдө», -- диэтэ. Онтон биир эр киһи кэлэн түһэрбит хаартыскаларын: «Бу эбэбит иччилэрэ үөрбүттэр», -- диэн көрдөрдө.
Түҥ былыргы кэмнэртэн саха аймах Ытык Эбэбит Сайсары тула уутуйан үөскээн-олохсуйан олорбуттарыгар, олороллоругар махтанабыт! Өрөгөй өйдөөх дьоммут манна Ыһыах ыспыттарыгар, или-эйэни олохтообуттарыгар сүгүрүйэбит! Урукку үйэлэргэ билигин Триумф турар сиригэр Тыгын Дархан олохсуйан олорон сахалары түмпүтэ, или-эйэни олохтообута дииллэр. Эллэй Боотур Үрдүк Айыылар ыйаахтарынан Сайсары Эбэҕэ удьуор-силис тардан, олохсуйан олорон, сахалар төрүт үгэспитинэн Ыһыах ыспытын күн бүгүҥҥэ диэри кэрэ кэпсээн оҥостобут. Ытык Эбэбит Сайсары саха омук төлкөлөөх түөрэҕин түстээбитэ.
Дьоллоох Дьокуускайбыт сахалыы ис тыынын налыччы тутан сытарыгар Айхалбытын аныыбыт, Тускубутун туһаайабыт! Үрүҥ Күммүт суолунан сылдьыаххайыҥ, Айыы Суолун тутуһуоххайыҥ! Бу ураты сиэри-туому атын улуустарга хабан ылан, олоххо киллэриэхтэрэ диэн эрэнэбит!
Арчы Аана.
