Ойуур баһаардарын балаһыанньата ыараабытынан, от ыйын 10 күнүттэн Саха сиригэр эрэгийиэн таһымнаах ыксаллаах быһыы-майгы биллэриллэр. Эбии күүстэри, үбү-харчыны түмэргэ ити курдук быһаарыыны от ыйын 9 күнүгэр ылыннылар.
Ыксаллаах быһыыны-майгыны сэрэтэр, ол содулун туоратар уонна баһаартан сэрэхтээх буолууну хааччыйар хамыыһыйа мунньаҕар Ил Дархан Айсен Николаев ойуур баһаара элбээн иһэригэр халлааммыт “төһүү” буоларын эттэ. Бу күннэргэ өрөспүүбүлүкэ киин улуустарыгар +35...+36 кыраадыс куйаас буолара күүтүллэр. Аны туран, халлаан арыый сөрүкүүр түгэнигэр, тыала-кууһа күүһүрүөхтээх, этиҥнээх ардахтар түһүөхтээхтэр. Биллэн турар, ол барыта ойуурдарга уот барар кутталын үөскэтэр.
От ыйын 8 күнүн киэһэтин туругунан, Саха сиригэр 18 улууска 57 сиргэ ойуур уота күүдэпчилэнэр. Уоту кэтииргэ уонна умулларарга 18 көтөр аал үлэлиир. Онтон быһаччы умулларыытыгар биэс “Ми-8” бөртөлүөт сылдьар.
