Өлөөн Ээйигин таһыгар турбут баһаары умулларарга 117 киһи, 12 вездеход уонна 5 массыына үлэлии сылдьаллар. Ол туһунан СӨ экологияҕа миниистирин солбуйааччы Андрей Коноплев кэпсээтэ.
“Соторутааҕыта бөһүөлэк хоту уонна хотугулуу-арҕааҥҥы өттүгэр турбут уоттарга утары уоту ыыппыттара. Билигин ол сирдэри кэтии-маныы сылдьаллар. Бэлиэтээн эттэххэ, уот нэһилиэнньэлээх пуун территориятыгар суоһаабат”, – диэтэ Коноплев.
Миниистир солбуйааччыта этэринэн, наада буолар түгэнигэр, Ээйик күөл арҕааҥҥы кытылыгар турар оҕо сынньанар лааҕырын көмүскүүргэ бэлэмнэр.
Ааспыт суукка иһигэр Аммаҕа, Намҥа уонна Өлөөҥҥө барыта 25 304,5 гаа иэннээх баһаары умуллардылар. Атырдьах ыйын 3 күнүн сарсыардатын туругунан, Саха сиригэр 12 улууска 72 сиргэ ойуур умайа турар. Аммаҕа, Мииринэйгэ, Кэбээйигэ, Ленскэйгэ, Орто Халымаҕа уонна Майдаҕа сэттэ улахан уоту баар. Баһаары утары барыта 333 киһи уонна 36 араас тиэхиньикэ үлэлиир.
Саха сиригэр баһаардарынан сибээстээн биллэриллибит ыксаллаах быһыы-майгы эрэсиимэ салгыы үлэлиир. Кэбээйигэ уонна Өлөөҥҥө – улуус таһымнаахтар.
