Амма улууһугар агроном идэлээх Галина Пелепейкина дьаабылыкатын хомуйан саҕалаата.
Амма улууһун Покровка нэһилиэгин олохтооҕо, РФ үтүөлээх агронома Галина Пелепейкина бэйэтин тиэргэниттэн үүннэрии дьаабылыканы хаһыс да сылын хомуйар.
Кини хас да сыллааҕыта Свердловскай уобаластааҕы саад үүнээйилэригэр уопут оҥорор ыстаансыйата сэлиэксийэлээн таһаарбыт дьаабылыкатын күһүҥҥү суордун олордубута. Бу булкаас көрүҥү сэлиэксийэнэн дьарыктанааччы Л.А. Котов таһаарбыта. Кини дьаабылыка Анис пурпур уонна Канада Мелбы суортарын холбообута. 2009 сыллаахха барыта түөрт арассаада почтанан кэлбититтэн, биир үүнээйи тыыннаах хаалбыта.
“Дьаабылыкам отоно төкүнүк, күөхтүҥү өҥнөөх. Хаҕа кураанах, килэбэчигэс, буосканан сотуллубут курдук бүрүөһүннээх. Аһыы минньигэс амтаннаах уонна дьиҥнээх дьаабылыка сыттаах. Балаҕан ыйыгар аһа толору ситэр. 2014 сылтан ас кутан барбыта”, – диэн Галина Альбертовна Пелепейкина кэпсээтэ.
Amma_olo5о хаһыат матырыйаалынан Kyym.ru
Хаартыска: Амма олоҕо.
