Бу күннэргэ Өлүөнэ күргэтин пилонун (аарыма улахан тирэҕин) туруорарга сыбаайалар оннуларын үүттээн саҕалаатылар. Манна күргэ саамай улахан тирэҕэ тутуллуохтаах. Кини үрдүгэ 284,5 миэтирэ буолара былааннанар, о.э. 90 этээстээх дьиэ саҕа.
“ВИС” хампаанньа иһитиннэрэринэн, күргэ киин тирэҕин туруорарга бастакы үүттүүр-буурдуур массыына коффердам иһигэр номнуо үлэтин саҕалаабыт. Тутааччылар манна 1,5 миэтирэ диаметрдаах, 27,1 миэтирэ уһуннаах 208 сыбаайаны түһэриэхтээхтэр. Онно 10 тыһ. кууб бөтүөн ороскуоттаныа диэн суоттаналлар.
Даҕатан эттэххэ, үлэ саҕаламмыт коффердамын от ыйын 17-18 күннэригэр өрүскэ киллэрэн туруорбуттара. Бу эбийиэк 46 миэтирэ диаметрдаах уонна 17,3 миэтирэ үрдүктээх. Конструкцияны эбэҕэ оннун булларан баран, иһигэр ыарахан ыйааһыннаах тиэхиньикэ куттала суох үлэлииригэр анал былаһаакка бэлэмнээбиттэр. Билигин үүттээһин үлэтэ саҕаламмыт. Онуоха тимир арма-каркастар хайыы үйэ бэлэм сыталлар эбит. Маныаха коффердамҥа иккис буурдуур массыынаны тиэйэн аҕаларга бэлэмнэнэллэр.
Өрүс кытылыгар үлэ эмиэ оргуйа турар. Күн бүгүн 268 сыбаайа үүтэ бэлэм буолбут. Манна барыта 920 сыбаайа түһүөхтээх. Билиҥҥитэ биэс тиэхиньикэ үүттүүр үлэлэри толорор. Бырайыак быһыытынан, күргэ уопсайа 26 өйөбүллээх буолуохтаах. Мантан хаҥас биэрэккэ 3 өйөбүлү, уҥа биэрэккэ – 8 өйөбүлү туруорбуттар. Аны билиҥҥитэ 10 миэтирэ үрдүктээх өйөбүлү ситэрэн эрэллэр. Оттон сыл бүтүөр диэри эбии икки оҥоһуллуохтаах.
Санатан эттэххэ, Өлүөнэ күргэтэ үс аарыма улахан уонна сүүһүнэн өйөбүл тирэхтээх буолуоҕа. Бу Аартыка тыйыс айылҕатыгар аналлаах ураты инженернэй тутуу буолара сабаҕаланар. Маны таһынан, Арассыыйаҕа биир саамай улахан кыттыгас бырайыагынан биллэр. Манна федеральнай киин, өрөспүүбүлүкэ бүддьүөттэрэ уонна чааһынай үбүлээһин хардарыта кыттыһаллар. Тутуу саҕаланыытыгар чааһынай үбүлээһин ороскуот 47 %-нын ылыахтаах. Билиҥҥитэ 28 млрд. солк. ороскуоттанна диэн ааҕаллар.
Күргэ уһуна 14,5 км буолуо. Кини устуоруйаҕа аан бастакытын Саха сирин бары муннугун Арассыыйа киин федеральнай уонна өрөспүүбүлүкэтээҕи таһымнаах (тимир, өрүс, салгын тырааныспарын) суолларын бары көрүҥнэрин кытта ситимниэхтээх. Бу барыйыак “Олоххо-дьаһахха аналлаах инфраструктура” диэн национальнай тосхол иитинэн олоххо киириэхтээх. “ВИС” хампаанньа үбүнэн-харчынан сүрүн кыттыһааччы, тутааччы (концессионер) быһыытынан үлэлэһэр. Оттон былаас өттүттэн тутууну сүрүннээччи, сөбүлэҥ түһэрсээччи (концендент) – Саха Өрөспүүбүлүкэтин бырабыыталыстыбата буолар.
Бэй. кэр.
Хаартыска: Саргын Скрябин/СИА
MAX ханаалбытыгар кыттыһаргытыгар ыҥырабыт, өссө элбэх сахалыы сонуннар күүтэллэр: https://max.ru/join/db9mNXa521xrlrCKpuR1giif2-TeEMK9592hLc0ABcU
