Атырдьах ыйын 13 күнүгэр Өлөөн улууһун Ээйик бөһүөлэгин олох таһыгар туран дьону-сэргэни куттуу сылдьыбыт улахан ойуур уотун умуллардылар. Бөһүөлэк таһынааҕы ойуур сүүрбэттэн таха күнү быһа тохтоло суох умайда. Ол туһунан “Авиалесоохрана” сырдатта.
Баһаары от ыйын 23 күнүгэр авиа-ботуруул былааннаах көтүүтүн кэмигэр булбуттара, оччолорго иэнэ 2 гаа курдук этэ. Кэлин уот улаатан, инньэ 190 гаа иэннээх ойууру-сири күл-көмөр оҥордо.
Баһаары умулларарга “Авиалесоохрана” Үөһээ Бүлүүтээҕи, Сунтаардааҕы, Ньурбатааҕы, Эдьигээннээҕи салааларын байыастара, олохтоох дьон, быыһыыр сулууспа исписэлиистэрэ үлэлээтилэр. 17 араас тиэхиньикэ туттулунна.
Кыым.ру.
Хаартыска: CИА
