Аартыкатааҕы атыы-эргиэн уонна таһаҕаһы тиэрдии хампаанньа (Арктическая торгово-логистическая компания, АТЛК) хоту улуустар төрүт олохтоохторуттан сир аһын тутууну саҕалаата.
Орто Халыма улууһун дьоно-сэргэтэ 50 киилэ моруосканы (морошко) туттара оҕустулар. Оттон дьааҥылар – 96 киилэ сугуну. Быйыл хампаанньа нэһилиэнньэттэн уопсайа 10 туонна отону атыылаһара былааннанар.
Дьон хара тыаҕа хомуйбут отонун анал кииннэргэ аҕалан туттарар кыахтаах. Маныаха хампаанньа төлөбүрү уу харчынан эбэтэр аһынан-үөлүнэн төлөһүөн сөп.
“Бу курдук харчыта суох атастаһыы ньымата Аартыка уонна хотугу улуустар олохтоохторугар үп-харчы эргиирин биллэ чэпчэтиэ”, – диэн хампаанньа сүрүн дириэктэрэ Сайдам Степанов бэлиэтээтэ.
Быйыл сибиэһэй моруосканы киилэтин 1600-1700 солк., уохтаны – 650-750 солк., сугуну – 600-700 солк., отону – 300-350 солк. тутуохтара. Бу отон барыта хампаанньа сыахтарыгар тиийиэҕэ, мантан күһүн уонна кыһын “Аартыка амтана” (АрктикВкус) диэн ааттаах араас бородууксуйа оҥоһуллан тахсыаҕа.
Санатан эттэххэ, хотугу улуустарга атыы-эргиэн уонна таһаҕаһы тиэрдии кииннэрин тэрийии – Саха сирин Аартыкатын сайыннарыы биир сүрүн хайысхата. Бу бырайыак СӨ Ил Дарханын “Саха Өрөспүүбүлүкэтин Аартыкатын 2030 сылга диэри сайдыытын сүрүн хайысхалара” диэн ыйааҕар олоҕуран олоххо киирэ турар.
Бэй. кэр.
Хаартыска: rktisetaromit.fi
