Аллараа Бэстээххэ СӨ Бырабыыталыстыбатын бэрэссэдээтэлин солбуйааччы Сергей Местников уонна СӨ Тыатын хаһаайыстыбатын уонна аска-үөлкэ бэлиитикэтин миниистирин э.т. Анна Стручкова кыттыылаах сүөһү аһылыгын бэлэмнээһин боппуруостарыгар аналлаах сүбэ мунньах буолан ааста.
Мунньах кэмигэр Сергей Васильевич ити сыалга Ил Дархан Айсен Николаев сорудаҕынан быйыл 37 мөл. солк. көрүллүбүтүн эттэ. Маны сэргэ, Саҥа дьыл кэннэ халаан уутуттан эмсэҕэлээбит улуустарга оту тиэрдии, бэтэринэриийэ лабаратыарыйаларыгар оту анаалыстааһын уонна өрөспүүбүлүкэ үрдүнэн оттооһун хаамыытын туһунан дьүүллэстилэр. Маныаха Ленскэй, Орто Халыма уонна Муома дьаһалталарын тыа хаһаайыстыбатыгар салааларын салайааччылара улуустарыгар балаһыанньа сыыйа көнөн эрэрин бэлиэтээтилэр.
ТХМ миниистирин э.т. Анна Стручкова, атырдьах ыйын 13 күнүнээҕи туругунан, 192 531 га ходуһа охсуллубутун, итиэннэ 188 931 туонна от бэлэмнэммитин туһунан кэпсээтэ, о.э. былаан 45 % туолбутун эттэ. Ону тэҥэ 2 407 туонна сиилэс, 522 туонна сенаж хомуллубут. Сүөһү аһылыгын бэлэмнээһин хампаанньатыгар 22 546 киһилээх 8 095 звено, ол иһиттэн 2 961 толору тиэхиньикэлээх, 3 252 ситэтэ суох тиэхиньикэлээх, 27 ат көлөлөөх уонна 1 855 илии күүһүнэн оттуур звенолар үлэлии-хамсыы сылдьалларын туһунан иһитиннэрдэ. Өрөспүүбүлүкэ үрдүнэн барыта ходуһаҕа уонна бааһынаҕа 10 146 тыраахтар араас көрүҥэ тахсыбыт. Оттон Саха сирин алта улууһугар мобильнай биригээдэлэр тэриллибиттэр, 2 624 туонна оту оттообуттар.
Бэй.кэр.
Хаартыска: Арассыыйа хаһыата.
