“Полиметалл” хампаанньа халаан уутуттан эмсэҕэлээбит Үөһээ Дьааҥы улууһугар көмө – итии салгынынан үрэр 11 диисэллээх буусканы ыытта.
“Полиметалл” ААУо Саха сиринээҕи салаата халаан уутуттан дьиэлэрэ-уоттара эмсэҕэлээбит Дьааҥы улууһун олохтоохторугар гуманитарнай көмөнү оҥордо. Бу көмөнү Саха сиринээҕи баҕа өттүнэн үлэлиир ресурснай киин (Ресурсный центр добровольчества) нөҥүө тиэртилэр. Ол курдук, улууска итии салгынынан үрэр 11 бууска барда. Бу тэриллэр көмөлөрүнэн дьиэни-уоту сылааһынан үрдэрэн куурдуохха сеп.
“Билигин дьон-сэргэ дьиэтин-уотун дөбөҥнүк чөлүгэр түһэрэ охсоругар маннык тэриллэр наадалар. Субу курдук бууска куурдуу үлэтин биллэ түргэтэтиэн, чэпчэтиэн сөп. Ону таһынан, кыһын араас саахал кэмигэр эбийиэктэргэ эмиэ толору туһалыыр кыахтаахтар. Бу олоххо-дьаһахха олус наадалаах уонна туһалаах көмө буолуоҕа», – диэн тэрилтэ олохтоох салаатын тэхэньиичэскэй дириэктэрэ Вадим Воробьёв бэлиэтээтэ.
Итини таһынан, хампаанньа үлэһиттэрэ үгэс буолбут “Оскуолаҕа киирэргэ көмөлөс” диэн аахсыйаны ыыттылар. Кинилэр халаан уутуттан эмсэҕэлээбит ыаллар оҕолоругар оскуолаҕа наадалаах бары тэриллээх үрүсээктэри бэлэх туттарыахтара.
“Мин тус санаабар, маннык аахсыйаҕа кыттарым олус суолталаах. Үрүсээктэр уонна сурук-бичик табаардара мээнэ бэлэхтэр буолбатахтар, бу чахчы улахан көмө: кинилэр оҕолор үөрэх дьылыгар эрэллээхтик киирэллэригэр тирэх буолуохтара, оттон төрөппүттэргэ – бу үп-харчы өттүнэн уустук, ыктарыылаах кэмнэригэр, харчыларын харыстыахтара, кэмчилээһин оҥоруохтара”, – диэн хампаанньа үлэһитэ Артём Шведов санаатын үлэһиннэ.
Бэй. кэр.
Хаартыска: СИА.
