Атырдьах ыйын 16 күнүгэр Дьокуускай куоракка бу сайын эдэр ыччат биир саамай күүтүүлээх тэрээһинэ – YKT GEEK FEST 2026 үрдүк таһымнаахтык буолан ааста. Манна аниме, киинэ, комикс, видео уонна остуол оонньууларын, квесттар сүгүрүйээччилэрэ уонна сүүнэ таптааччылара “Туймаада” стадиоҥҥа тоҕуоруһа муһуннулар.
Быйыл тэрээһин өссө ордук баай уонна сэргэх ис хоһоонноох бырагыраамалаах ыытылынна. Бэстибээлгэ “Ааптардар сэлэлэрэ” (Аллея авторов), “Илиинэн оҥоһук дьаарбаҥката” (Ярмарка хэндмейд), уруһуй уонна кылгас киинэ куонкурстара, “Имана” диэн ойуулук сүрэхтэниитэ, “Айар” саҥа кинигэлэрин атыыта, квестар, муусукалаах лотуо, түөрт тиир, лазертаг, хаартыскаҕа түһүү, аһыы лапсаны сиэһиҥҥэ чөмпүйэнээт, о.д.а. олус сэргэх тэрээһиннэр кыттааччылары уонна ыалдьыттары сөхтөрдүлэр. Уонна, бу бэстибээл саамай чаҕылхай түгэнинэн – Уһук Илин үрдүнэн саамай киэҥ далааһыннаах – КОСПЛЕЙ буолла. Манна ураты көстүүмнээх уонна уобарастаах кыттааччылары дьон сөҕө-махтайа көрдө-иһиттэ. Биһиги хаһыаппыт ТОП-10 диэн бастыҥ косплеердары хаартыскаҕа түһэрэн, эһиги болҕомтоҕутугар таһаарар. Онон, самаан сайыммыт биир саамай чаҕылхай тэрээһинин ураты уобарастарын сэргээҥ, сыаналааҥ.
Kyym.ru
Хаартыска: Yakutia24/Якутия24
