Быйыл Саха сиригэр “Мин биисинэһим” киин “Урбаанньыт ийэ” диэн ааттаах куонкурсу ахсыс төгүлүн ыытта.
Санатан эттэххэ, Арассыыйаҕа “Урбаанньыт ийэ” диэн федеральнай бырагыраама үлэлиир. Бу өйөбүл оҕолоох ийэлэр бэйэ дьыалатын арыналларыгар эбэтэр үлэлии турар кыра эбэтэр дьоҕус урбааннарын салгыы сайыннаралларыгар көмөлөһөр аналлаах. Бу бырагыраама кыттыылаахтара буор босхо кылгас кэмнээх үөрэҕи ааһаллар. Кинилэр үөрэх кэмигэр бырайыак суруйаллар, сайыннараллар, онно биисинэскэ баай уопуттаах эспиэрдэр сүбэлииллэр, көмөлөһөллөр. Түмүккэ – бастыҥ бырайыактаах ийэни талан, бырайыагын олоххо киллэрэригэр, харчылаах сэртипикээтинэн бэлиэтииллэр.
Быйыл Саха сирин араас улуустарыттан ийэлэр кэлэн биэс күннээх үөрэҕи аастылар. Кинилэри биисинэһи сатаан тэрийиигэ, бырайыактары сууруйууга үөрэттилэр. Кыттааччылар араас лиэксийэлэргэ, маастар-кылаастарга, Drivee уонна ИТ-Паарка тэрилтэлэргэ экскурсияларга сырыттылар, хайдах бастакы килийиэннэри буларга, үбү-харчыны былаанныырга, сыал-сорук туруорунарга үөрэннилэр.
Бастыҥ бырайыагы быһаарар түмүктүүр куонкурска Екатерина Карпухина диэн ийэ бастаата уонна 150 тыһ. солк. суумалаах сэртипикээтинэн наҕараадаланна. Кини “Аллас” диэн олохтоох пиэмэрдэр бородууксуйаларын атыылыырга көмөлөһөр аналлаах аан ситим былаһааккатын бырайыагын оҥордо.
“Мин урбаантан олох ыраах киһибин. Онон куттана-куттана кытта кэлбитим. Онтон атын кыттааччылары кытары билсиһэн, кэпсэтэн, элбэх араас бырайыактар баалларын туһунан билбитим. Сыыйа үөрэнэн, билиим-көрүүм элбээн, куттанарым суох буолбута. Кэргэммин кытта сүбэлэһэн, саҥа идиэйэ толкуйдаан, олоххо киллэрэргэ быһаарынныбыт. Өскөтүн киһи бэйэтэ күүскэ баҕардаҕына, ол баҕатын ситиһэр эбит диэн санааҕа кэллим”, – диэн Екатерина Карпухина санаатын үллэһиннэ.
“Сылтан сыл толору сиппит-хоппут бырайыактаах ийэлэр элбээн иһэллэрэ үөрдэр. Билигин кыттааччылар грант эрэ туһугар буолбакка, билиигэ-көрүүгэ тардыһан кэлэллэрэ көстөр. Бу барыта саха урбаана сайдан иһэрин туоһулуур”, – диэн СӨ урбааҥҥа, атыыга-эргиэҥҥэ уонна туризмҥа миниистирин солбуйааччы Мария Карпова бэлиэтээтэ.
“Биһиэхэ “Урбаанньыт ийэ” быстах аахсыйа буолбатах, бу – дьиэ кэргэни өйөөһүн биир ньымата. Өскөтүн ийэ бэйэ дьыалатын арыйдаҕына, кини үлэ миэстэтин таһаарар, ол аата социальнай сорудаҕы толорор. Билигин оҕону көрөн олорон, ситиһиилээх биисинэһи тэрийэргэ бары кыаҕы толору туһаныахха сөп”, – диэн “Мин биисинэһим” киин салайааччыта Ирина Никифорова эттэ.
Быйылгы куонкурска сүрүн бирииһи таһынан, 100 тыһ. солкуобайдаах үс анал граны олохтоотулар:- Галина Антонова-Тен (Мэҥэ Хаҥалас улууһа) – Аллараа Бэстээххэ оҕо сынньанар уонна үөрэнэр киинин тэрийии бырайыага;
- Сахая Ачикасова (Булун улууһа) – “KYYS” диэн эти-сиини уонна куту-сүрү чэбдигирдэр киин бырайыага:
- Антонина Шадрина (Дьокуускай к.) – “Күн-Сиби” дьиэ кэргэн мастарыскыайын үлэтин далааһынын кэҥэтии бырайыага.
Онон, оҕо көрөн олорор ийэлэр, дьиэ кэргэн бүддьүөтүгэр эбии үбү-харчыны киллэриэххитин баҕарар буоллаххытына, ханнык баҕарар хайысхаҕа урбаан бырайыагын толкуйдаан, “Урбаанньыт ийэ” куонкурска кыттан, урбааҥҥа холонон көрүөххүтүн сөп.
Kyym.ru
Хаартыска: “Мин биисинэһим” киин.
