Атырдьах ыйын 17 күнүттэн 23 күнүгэр диэри Саха сиригэр арыгыттан аккаастаныы нэдиэлэтэ биллэрилиннэ.
СӨ Доруобуйаҕа харыстабылын министиэристибэтин саайта суруйарынан, өрөспүүбүлүкэҕэ атырдьах ыйын 17-23 күннэригэр арыгыттан аккаастаныы нэдиэлэтэ биллэрилиннэ. Бу дьаһал сүрүн сыала – арыгы доруобуйаҕа охсуутугар болҕомто ууруу, тустаах иһитиннэриилэри нэһилиэнньэҕэ тиэрдии уонна чөл олоҕунан олорууну көҕүлээһин.
Аан дойдутааҕы доруобуйа харыстабылын тэрилтэтэ (ВОЗ) этэринэн, арыгылааһын араас дьарҕа ыарыылары көбүтэр, олох-дьаһах хаачыстыбатын биллэ мөлтөтөр уонна киһи үйэтин кылгатар. Өскөтүн кылгас да кэмҥэ арыгыттан аккаастана сырыттахха, киһи доруобуйата биллэ сэргэхсийэр, утуйар уута тупсар, күүһэ-уоҕа эбиллэр, үлэлиир кыаҕа уһуктар. Онон, доҕоттор, мэлдьи чөл олохтоох, туруктаах буолуҥ!
Бу нэдиэлэ устата көрдөрөр-иһитиннэрэр эйгэҕэ арыгы буортутун сэрэтэр быраастар араас интэриэһинэй матырыйааллара тахсаллара былааннанар.
Kyym.ru
Хаартыска: Коллаж Kyym.ru
