Ил Дархан Айсен Николаев Чурапчы улууһугар сырытта. Үлэлиир сырыытын чэрчитинэн, Мырылаҕа тахсан, “Чурапчыга чочуллубут” (“Сделано в Чурапче”) диэн ааттаах-суоллаах олохтоох оҥорон таһарааччылар дьаарбаҥкаларын сэргээн көрдө. Кини чурапчылар бородууксуйаларын хаачыстыбатын үрдүктүк сыаналаата.
“Чурапчыга чочуллубут” диэн бреҥҥэ улуус тыатын хаһаайыстыбатын оҥорон таһаарааччыларын бородууксуйалара, төрүт дьарыгы сайыннарар урбаанньыттар табаардара киирсэллэр. Бренд сүрүн сыалынан – Чурапчы улууһун бородууксуйатын уонна табаарын өрөспүүбүлүкэ эрэ иһигэр буолбакка, Саха сирин тас өттүгэр эмиэ билинэллэрин, биһирииллэрин ситиһии буолар.
“Чурапчы улууһа Саха сиригэр тыа хаһаайыстыбатын салаатын утумнаахтык сайыннарар. Онно олохтоох урбаан эмиэ күүскэ үлэлэһэр. Онон биһиги бары сыалбыт-сорукпут – олохтоох бородууксуйабыт өрөспүүбүлүкэ бары олохтоохторугар – соҕурууттан саҕалаан Аартыкаҕа тиийэ – дьоҥҥо тиийимтиэ буоларын ситиһии”, – диэн өрөспүүбүлүкэ баһылыга бэлиэтээтэ.
Бу дьаарбаҥка-быыстапкаҕа “Чурапчы” ТХПК, “Эргис” ТХПК, “Эрэл” ТХППК“”, о.д.а. бородууксуйаларын туруордулар. Тэрээһин кыттыылаахтара эттэн, үүттэн, бурдуктан оҥоһуллубут аһы-үөлү атыылаатылар, ол курдук Чурапчы бурдугуттан оҥоһуллубут килиэп, айылҕа отонноруттан араас бородууксуйа, чэй, мүөт, о.д.а. хамаҕатык атыыга бардылар.
Санатан эттэххэ, олохтоох оҥорон таһаарааччылары өйүүр сыалтан, 2026 сыл – Чурапчы улууһугар “Олохтоох оҥорон таһаарыы сылынан” биллэриллибитэ.
Kyym.ru sakha.gov.ru матырыйаалынан.
Хаартыска: Андрей Сорокин/СИА.
