От ыйыгар бэнсиин сыаната, ааспыт ыйы кытта тэҥнээтэххэ, ортотунан 13,53 %-нан үрдээбит. Сахастат дааннайынан, суумата 90,92 солк. тэҥнэспит диэн СИА суруйар.
Сахастат дааннайынан, ордук күүскэ уматык маннык көрүҥнэрэ ыараабыттар:
АИ-92 +14,11 %
АИ-95 + 13 %
АИ-98, онтон үрдүк мааркалар + 9,74 %
Диисэл + 7,32 %
Гаас + 1,63 %
Сыана сир-сир аайы халбаҥныы турар. Холобур, Дьокуускайга от ыйыгар АИ-92 ортотунан 91,13 солк. атыыламмыт, оттон Нерюнгрига – 76,66 солк. Уопсайынан, сыл саҕаланыаҕыттан өрөспүүбүлүкэҕэ бэнсиин сыаната 17,49 % үрдээбит эбит. Оттон Арассыыйа таһымыгар ылан көрдөххө, Уһук Илин эрэгийиэннэригэр сыана ортотунан 81,67 солк., киин Арассыыйаҕа – 77,14 солк. буола сылдьыбыт. Саамай ыарахан сыана – Саха сиригэр бэлиэтэммит – ортотунан 90,92 солк. тэҥнэспит.
“Туймаада-нефть” тэрилтэҕэ сыана бэс ыйын ортотугар (онтон өссө төгүл от ыйыгар) үрдээбитэ. Бэс ыйын 22 күнүгэр “СибОйл” үрдэппитэ, онтон от ыйын 7 күнүгэр “Саханефтегазсбыт” сыананы уларыппыта. Саха сиригэр уматык боппуруоһа өрөспүүбүлүкэ салалтатын уонна федеральнай уорганнар хонтуруолларыгар сылдьар. Билиҥҥитэ саппаас сөптөөх кээмэйэ баар итиэннэ тиэйии бигэргэтиллибит кыраапыгынан бара турар. Уматык сүрүн кээмэйэ пуойаһынан “Саханефтегазсбыт” (Томмот, Аллараа Бэстээх, Усть-Кут ыстаансыйаларыгар), “Туймаада-нефть”, “СибОйл”, “СервисОйл” уонна “Паритет” хампаанньаларга кэлэ турар. Саха сиригэр уопсайа 182 АЗС үлэлиир. Сорох АЗС-тарга уматыгы биэрии быстах кэмнээх хааччахтааһына өссө да уһулла илик.
Kyym.ru.
Хаартыска: АО «Саханефтегазсбыт»
