Үөһээ Дьааҥы улууһугар халаан уутуттан эмсэҕэлээбит олохтоохтортон матырыйаалынай көмөҕө сайабылыанньалары хомуйуу салҕанан бара турар. СӨ Тутууга министиэристибэтин исписэлиистэрэ биэс нэһилиэккэ барыта 262 олорор дьиэни көрдүлэр. Онтон 94 дьиэ өрөмүөҥҥэ наадыйара, биир ыал дьиэтэ букатын суох буолбута чопчуланна.
СӨ Бырабыыталыстыбатын бэрэссэдээтэлин бастакы солбуйааччытын эбээһинэһин толорооччу Николай Бочков олохтоохторго көмөлөһүү боппуруостарынан уонна чөлүгэр түһэрэр үлэлэр хаамыыларынан сүбэ мунньах тэрийдэ.
Мунньах кэмигэр сайабылыанньалары хомуйан баран, докумуоннары СӨ Үлэҕэ уонна социальнай сайдыыга министиэристибэтигэр ыыталларын туһунан иһитиннэрдилэр. Үбүнэн көмө кээмэйин быһаарарга улууска эмсэҕэлээбит дьон испииһэгин оҥорууну түргэтэтэр туһунан сорудах бэрилиннэ. Үөһээ Дьааҥы куоратыгар 16, Сайдыыга – 21, Боронукка – 26, Суордаахха – 18, онтон Дулҕалаахха 14 олорор дьиэни чөлүгэр түһүөхтээҕин туһунан этилиннэ.
Халаан уутун содулун туоратарга, бэс ыйын 12 күнүттэн атырдьах ыйын 18 күнүгэр диэри улууска барыта 25 авиарейс оҥоһуллубут. Уопсайа 36 туоннаттан тахса гуманитарнай таһаҕас тиэрдиллибит, ол иһигэр өрөспүүбүлүкэ матырыйаалынай саппааһыттан олоххо-дьаһахха бастакы уочарат наадалаах малы-салы тиксэрбиттэр. Мунньахха ону таһынан быыһыыр уонна чөлүгэр түһэрэр үлэлэри, гуманитарнай көмөнү уонна тутуу матырыйаалларынан эбии хааччыйыы боппуруостарын тула дьүүллэстилэр. Ону кытары “Полярные авиалинии” хампаанньа көтөр аалларын эбии көмөҕө тардыыны үөрэтэн көрүөхтэрэ.
Билигин халаан уутуттан эмсэҕэлээбит нэһилиэктэртэн 63 оҕо Дьокуускай куорат лааҕырдарыгар сынньана сылдьар. Кинилэри атырдьах ыйын 25 күнүттэн дьиэлэригэр төнүннэрии саҕаланыахтаах. Ол рейстэринэн устудьуоннар тутар этэрээттэрин төттөрү ыытарга былааннаатылар. Ити кэмҥэ диэри чөлүгэр түһэрэр үлэлэр салҕанан бара туруохтара. Маны таһынан, мунньахха халаан уутуттан эмсэҕэлээбит улуустарга кыстыкка бэлэмнэнии боппуостарын тула кэпсэтии буолла. СӨ Тыа хаһаайыстыбатыгар уонна аска-үөлгэ министиэристибэтин быһа барыллаан ааҕыытынан, 15 улууска уопсайа 45 тыһыынча туонна кэриҥэ от наада. Онно мобильнай биригээдэлэр көмө буолуохтара.
Бэй.кэр.
Хаартыска: Российская газета.
