Хаҥалас улууһугар сүппүт, 65 саастаах Роза Гаврильева билигин даҕаны көстө илик. Ол туһунан сэрэдэҕэ кини аймах-билэ дьоно СИА-ҕа кэпсээбиттэр.
“Бүгүҥҥү туругунан, 14 киһи көрдөө сылдьар. Бөлөҕүнэн араҕыстыбыт, араас сири кэрийэбит. Туох да суол-иис суох, бэл, биэдэрэтэ көстүбэтэ”, -- диэн бэҕэһээ көрдүүр бөлөх кыттыылааҕа кэпсээбит. Көрдөөһүнү тохтотор былааннара суох.
Санаттахха, 65 саастаах Роза Гаврильева Хаҥалас Еленакатыттан атырдьах ыйын 12 күнүгэр сатыы сир астыы диэн тахсан баран сураҕа суох сүппүтэ.
Кинини билигин Саха сирин быыһыыр сулууспатын исписэлиистэрэ, аймахтара уонна үтүө көмөһүттэр көрдүүллэр. Киһи-сүөһү дэбигис тиийбэт сирдэрин “Соболь” массыынанан, квадроциклынан уонна тепловизордаах пилота суох көтөр аппараатынан кэрийэллэр.
