Саха сирин Арктикатыгар балыктааһын үгэнэ. Бүгүҥҥү туругунан, 479,8 туонна балыгы бэлэмнээтилэр, о.э. былырыыҥҥытааҕар 14,1 %-нан элбэҕи. Ол туһунан СӨ Тыатын хаһаайыстыбатын уонна аска-үөлгэ бэлиитикэтин министиэристибэтэ иһитиннэрдэ.
Быйылгы сайыҥҥы балыктааһыҥҥа 143 биригээдэ уонна 470 балыксыт үлэлиир. Балар бары кэмигэр уматыгынан хааччыллыбыттар.
“Арктика бары улуустарыгар сайыҥҥы балыктааһын бара турар. Быйыл балыкка 143 биригээдэ уонна 470 балыксыт тахсыбыта. Күн бүгүн 479,8 туонна балыгы номнуо бэлэмнээтилэр, ити былырыыҥҥы көрдөрүүнү 14,1 % куоһарар. Хаһаайыстыбалар бары кэмигэр уматыгынан хааччыллыбыттара”, – диэн ТХМ хотугу төрүт дьарыгы уонна балыктааһыны сайыннарар салаатын салайааччыта Иннокентий Баланов бэлиэтээтэ.
Аллараа Халыма улууһугар 86,8 туоннаны («Турваургин» – 7 туонна, «Походскай» – 26,6 туонна, урбаанньыт Негреба Н.П. – 31,8 туонна, урбаанньыт Давиденко – 21,2 туонна) бэлэмнээбиттэр. Билигин олохтоох балыксыттар бородууксуйаларын Дьокуускайга ыытаары теплоход-рефрижератор кэлэрин күүтэллэр.
ТХМ бэлиэтээн суруйарынан, билиҥҥитэ хотуту улуустар балыксыттара өрөспүүбүлүкэ олохтоохторун сибиэһэй уонна хаачыстыбалаах балыгынан хааччыйарга сыал-сорук туруорунан дьулуһаллар. Ил Дархан Айсен Николаев олохтоох бородууксуйаны сайыннарыы стратегиятынан, 2030 сылга диэри бэйэ оҥорор таһаарар бородууксуйа кээмэйэ 1,5 төгүл элбиэхтээх.
Бэй.кэр.
Хаартыска: ТХМ.
