Үөрэх дьыла чугаһаата. Онон сиэттэрэн, быйылгы үөрэх дьылыгар оскуолаларга туох саҥа уларыйыылар киирбиттэрин туһунан кылгастык билсиэххэ.
Төлөпүөн – бобуулаах
2024 сылтан үөрэнээччилэр оскуолаҕа уруок кэмигэр төлөпүөнү тутталлара бобуллубута. Бу үөрэх дьылыгар бу быраабыланы эмиэ тутуһуохтара. Уруок кэмигэр оҕолор төлөпүөннэрин учууталга туттарар буолуохтара. Гаджеты сынньалаҥ эрэ кэмигэр көрөр көҥүллэниэҕэ. Ол гынан баран, Госдумаҕа үөрэнээччи оскуолаҕа төлөпүөннээх сылдьарын олоччу бобор туһунан кэпсэтиилэр бара тураллар. Өскөтүн оннук сокуон ылылыннаҕына, оҕолор оскуолаҕа төлөпүөннээх кэлэллэрэ, олоччу бобуллуоҕа.
Саҥа биридимиэт киириэҕэ
Быйылгы үөрэх дьылыттан оскуола бырагырааматыгар “Арассыыйа духуобунай уонна сиэр-майгы өттүнэн култуурата” (Духовно-нравственная культура России) диэн саҥа биридимиэт эбии киириэҕэ. Бу биридимиэти 5 кылаастан саҕалаан үөрэтиэхтэрэ. Уруоктар сыл иккис аҥарыттан саҕаланыахтара, кээмэйэ – 17 чаас буолуоҕа. Бу уруокка оҕолор дойду төрүт норуоттарын үгэстэрин, сиэр-майгы уонна гражданскай ытык иэс курдук өйдөбүллэри кытта сиһилии билсиэхтэрэ.
Бу сылтан история чааһа элбиэҕэ. 5 кылааска аан дойду историятын кээмэйэ 68 чаас, эрэгийиэн историята 34 чаас буолуохтара. 6-с уонна 7-с кылаастарга – аан дойду историята 28 чаас, Арассыыйа историята – 57 чаас, түөлбэ (краеведческай) история – 17 чаас буолуохтара. 8-с кылааска аан дойду историята – 34 чаас, Арассыыйа историята – 68 чаас, 9-с кылааска аан дойду историята – 23 чаас, Арассыыйа историята – 45 чаас буолуохтара.
Омук тылын уруога аҕыйыаҕа
Бу үөрэх дьылыгар омук тылын уруоктара аҕыйыахтара. 5-с кылааска нэдиэлэҕэ үс уруок оннугар икки уруок буолуоҕа. 6-с уонна 7-с кылаастарга эһиилги үөрэх дьылыгар аҕыйыаҕа. 8-с уонна 9-с кылаастарга ноҕорууската нэдиэлэҕэ 3 чаас буолуоҕа.
Kyym.ru.
Хаартыска: СИА.
