Быйыл, Саха Өрөспүүбүлүкэтин бастакы бэрэсэдьиэнин М.Е. Николаев көҕүлээһининэн тэриллибит, “Гохран” (“Сокровищница Якутии”) 30 сылын бэлиэтээтэ.
Атырдьах ыйын 28 күнүгэр СӨ Ил Дархана Айсен Николаев тэрилтэ үлэһиттэрин уонна бэтэрээннэрин кытта көрүстэ уонна бэлиэ даатанан эҕэрдэлээтэ.
“Бүгүн – бэлиэ күн. Лоп-бааччы 30 сыл анараа өттүгэр Саха сирин күндү таастарын уонна көмүстэрин судаарыстыбаннай пуондата тэриллибитэ. Онтон ыла бу ураты устуоруйалаах уонна суоллаах-иистээх тэрилтэҕэ кубулуйда. Билигин Арассыыйаҕа маннык баай уонна бүтүн дойду таһымыгар билиниллибит пуонда биһиэхэ эрэ баар”, – диэн Айсен Сергеевич бэлиэтээтэ.
Бу бэлиэ күнү көрсө “Историяны бары бииргэ харыстыаҕыҥ” диэн анал аахсыйа буолла. Бу аахсыйаҕа бырамыысыланнас тэрилтэлэрин салайааччылара, ювелир уустар, үөрэх кыһалара пуондаҕа сэдэх оҥоһуктары бэлэх ууннулар. Холобур, Саха сирин бастакы бэрэсэдьиэнин Михаил Николаев дьиэ кэргэнэ Саха сирин бастакы бэрэсэдьиэнин түөскэ анньыллар өйдөбүнньүк бэлиэтин бэлэхтээтилэр. Бу бэлиэнэн Михаил Ефимович өрөспүүбүлүкэ судаарыстыбаннаһын, гражданскай эйэни уонна сөбүлэһиини бөҕөргөтүүтүн иһин наҕараадаламмыта биллэр.
Тэрилтэ үбүлүөйдээх сылыгар “Бриллианнар чаҕылыйар уоттара” (“Сияние бриллиантов”) диэн быыстапка аһыллан үлэлиэҕэ. Дьоҥҥо-сэргэҕэ аан бастакытын АЛРОСА бастыҥ алмаастарын көрдөрүөхтэрэ – “Гохран төрүттэммитэ 30 сыла” (53,43 караттаах), “Саха сирин көмүс кылаата” (75,30 караттаах).
Kyym.ru.
Хаартыска: Мария Васильева/СИА
