Дьокуускай куорат салалтатын үүммүт нэдиэлэтээҕи былаанныыр мунньаҕар мээр Дмитрий Садовников управаларга “Чөҥөчөҕө суох куорат” диэн анал аахсыйа биллэрдэ. Манна бэлиэтээн эттэххэ, киин куоракка сиргэ көмүллүбүт былыргы чөҥөчөктөр сир ирдэҕин аайы тротуардары уонна суоллары үтэйэ анньан тахсан кыҕалҕа бөҕөтүн үөскэтэллэр, хаамар сир уонна суол ньуурун алдьаталлар.
Мээр управаларга былаан туруорда – 100-тэн итэҕэһэ суох чөҥөчөҕү суох оҥоруохтаахтар. Үлэ түмүгүн ханнык учаастакка хас чөҥөчөҕү хостообуттарын, ыраастаабыттарын хаартыскаҕа түһэрэн отчуоттуохтаахтар. Аахсыйа усулуобуйатынан, ыраастааһын кэннэ сири-уоту оннугар түһэриэхтээхтэр, бөҕү бүтүннүү хомуйуохтаахтар.
Бу аахсыйаҕа бастыҥ үлэни көрдөрбүт управа бэйэ сирин-уотун салгыы тупсаран оҥороругар, сайыннарарыгар 2 мөл. солк. уу харчынан бэлиэтэниэҕэ. Иккис уонна үһүс миэстэ 1,5 мөл. солк. ылыахтара. Былааны толорбут уокуруктар бэлиэтэниэхтэрэ.
“Биһиги сыалбыт – аҥардас сиикэй отчуот эрэ буолуо суохтаах. Үлэ түмүгэ куорат олохтоохторугар көстүөхтээх”, – диэн Дмитрий Садовников бэлиэтээтэ.
Kyym.ru.
Хаартыска: СИА/Д.Д. Садовников МАХ ханаалыттан.
