Бүгүҥҥүттэн Хаҥалас улууһун оскуолалара уонна уһуйааннара сирэй көрсөн үөрэтиигэ төнүннүлэр. Ол туһунан "Хаҥалас улууһа" МТ пресс-сулууспата иһитиннэрэр. Маннык быһаарыыны улуус оперативнай ыстаабын мунньаҕар ылыннылар.
«Чкалов сэлиэнньэтигэр ыалдьа сылдьааччы элбэҕинэн, 3-с Малдьаҕар оскуолатын үөрэнээччилэрэ өссө да дьиэттэн үөрэниэхтэрэ. Арыллыбыт үөрэх тэрилтэлэригэр Роспотребнадзор ирдэбилин тутуһан, үөрэнээччилэр температураларын кээмэйдиэхпит, салгылатыы уонна дезинфекция күннэтэ ыытыахпыт", - диэн улуус баһылыга Олег Иринеев нэһилиэнньэҕэ быһааран эппит.
Санатан этэр буоллахха, оҕолор тохсунньу 19 күнүттэн дьиэттэн үөрэнэ сырыттылар.
Хаартыска: Владимир Григорьев