Бэҕэһээ интэриниэт ситиминэн Дьокуускайдааҕы килиэп кэмбинээтэ, оҥорон таһаарар ороскуота улааппытынан, 2022 олунньу 10 күнүттэн бэйэтин бородууксуйатыгар кууһунан атыы сыанатын ортотунан 5% үрдэтэрин туһунан иһитиннэриитэ киэҥник тарҕанна. Тэрилтэ салайааччыта Ирина ФУРМАН нэһилиэнньэ сөбүлээн атыылаһар 1 суортаах «Пшеничнай» уонна «Дарницкай» килиэптэригэр сыана уруккунан хааларын, бу көрүҥнэргэ сыана 2018 сылтан үрдээбэккэ турарын тоһоҕолоон эппит.
Оттон Мохсоҕоллоохтооҕу килиэп собуотун дириэктэрэ Сергей ГРЕБНЕВ бу боппуруоһу быһаара иликпит диэтэ. Собуот 9 көрүҥ килиэби астаан атыыга таһаарар. Сүрүннээн Хаҥалас улууһун хааччыйар уонна Дьокуускайга атыылыыр. "Былырыын бурдук сыаната үрдээбитигэр, СӨ Тыа хаһаайыстыбатын министиэристибэтэ икки кыбаарталга кыра өйөбүл олохтоон, сыанабытын үрдэппэккэ оннунан хаалларбыппыт. Ол көмө харчынан нолуокпутун төлөөбүппүт. Онон олохтоох оҥорон таһаарааччыларга, аччыгый урбаанньыттарга кыра да өйөбүл тыын суолталаах буолар эбит. Быйыл судаарыстыбаттан өйөбүл оҥоһуллар чинчитэ суох, онон минуска барбат туһугар бородууксуйабыт сыанатын кулун тутартан үрдэтэргэ тиийэбит. Килиэби оҥорон таһаарыы ороскуота бурдук эрэ буолбатах, олус элбэх", - диэн Сергей Геннадьевич санаатын аһаҕастык үллэһиннэ. Кини килиэби оҥорон таһаарыы уустуктарын уонна олохтоох ырыынак ымпыктарын-чымпыктарын сиһилии билиһиннэрдэ. Нэһилиэнньэ килиэбинэн хааччыллар кыһалҕатыгар үрдүкү салалта үчүгэйдик болҕойуох тустааҕын чиҥэтэн эттэ.
Нөмүгүтээҕи килиэп собуотун салалтата бу ыйытыыга чопчу хоруйдуу илик.
Эспиэрдэр Арассыыйа үрдүнэн килиэп сыаната тоҕо үрдээбитин коммунальнай өҥөҕө, тырааныспарга сыана үрдээһинин, олохтоох ырыынакка тэҥэ суох усулуобуйа үөскээһинин кытта ситимнииллэр. Ону сэргэ бурдук кыра баартыйанан тахса турарын, судаарыстыба өттүттэн өйөбүл оҥоһуллара быһаарылла илигин бэлиэтииллэр.
Хаартыска: Мохсоҕоллоохтооҕу килиэп собуотун саайтыттан
