Италияҕа хамсыкка сыһыаннаах улахан уларыйыы буолла, кинилэр таһырдьа маасканы кэтиини булгуччута суоҕунан аахтылар. Ол эрээри, элбэх киһи тоҕуоруһа мустар түгэнигэр, аны туран, маасканы кэтиллиэхтээх. Субу маннык уурааҕы ити дойду Доруобуйа харыстабылын тойоно Роберто Сперанцы таһаарбыт. Corriere della Sera Италия саайта этэринэн, дьаһалы олунньу 11 күнүттэн олоххо киллэриэхтэрэ. Докумуоҥҥа сурулларынан, дьиэ иһигэр маасканы кэтии кулун тутар 31 күнүгэр диэри уһаата. Бу хааччахтаах дьаһал, арай, алта саастарын туола илик оҕолорго, маасканы кэтэри көҥүллэммэт ыарыылаахтарга уонна успуордунан дьарыктанааччыларга тарҕаммат.
Италияҕа кэлиҥҥи сууккаҕа 100 тыһ. тахса киһи саҥа хоруона вируһунан ыалдьыбыт уонна ити ыарыыттан сылтаан 415 киһи өлбүт. Өрөспүүбүлүкэ былаастара, быһыыны ылыы түмүгэр, хамсык балаһыанньата тупсан эрэрин туһунан этэллэр.
Санатар буоллахха, эрдэ биллибитинэн, бу соторутааҕыта Швеция хамсыкка сыһыаннаах хааччахтары эмиэ көтүрбүтэ.
