Олунньу 11 күнүнээҕи туругунан, Саха сиригэр 2870 киһи саҥа хоруона вируһунан сутулунна. Бу иннинээҕи күн 2967 этэ. Ордук элбэх киһи, буоларын курдук, Дьокуускай куоракка ыалдьыбыт, ахсаана – 1348. Оттон үтүөрбүт киһи ахсаана 4816 буолбут, бэҕэһээ 4576 этэ.
Суукка иһигэр өрөспүүбүлүкэ лабаратыарыйаларыгар 8469 хоруона вируһун булууга чинчийии буолбут. Хамсык саҕаланыаҕыттан 2 059 675 тиэст оҥоһуллубут.
stopcovid19.sakha.gov.ru саайка сурулларынан, киин куораппытыгар ыалдьааччы уопсай ахсаана 2717.
Федеральнай суһал ыстаап киинэ суруйбутунан, олунньу 10 күнүгэр 325 киһи ыалдьан, балыыһаҕа киирбит. Оттон, өрөспүүбүлүкэтээҕи суһал ыстаап киинэ этэринэн, ааспыт сууккаҕа 97 саҥа ыалдьыбыт киһи балыыһаҕа утаарыллыбыт.
Быһыы бастакы кэмпэниэнин 584 350 киһи ылбыт, бу улахан дьон нэһилиэнньэтин 81,5% ылар. Хаттаан быһыыны 135 089 киһи ылбыт, бу хос ылыахтаах дьон 57,0% эбит.
