Төрөөбүт тылбыт билиҥҥи туруга уонна кэскилэ оҕо аймах, кэнчээри ыччат төрөөбүт тылын төһө билэригэр уонна күннээҕи олоххо хайдах туттарыгар арылыччы көстөр.
Биллэрин курдук, оҕо төрөөбүт тылыгар сыһыана маҥнай дьиэ кэргэҥҥэ үөскүүр, онтон тас эйгэттэн тутулуктанар. Ол иһин бука бары төрөөбүт тыл атын эйгэлэргэ киэҥник туттуллуутун араас ньыманан көҕүлүүр соруктаахпыт.
"СИТИМ" медиа-бөлөх уонна КЫЫМ.РУ аан ситим Төрөөбүт тыл, сурук-бичик күнүн көрсө оҕолорго анаан "МИН САХАБЫН!" диэн видео күрэһин тэрийэн ыыта турар. Күрэскэ оскуола иннинээҕи саастаах уонна алын сүһүөх үөрэнээччилэрэ кытталлар.
Олунньу 11 күнүгэр диэри видеолары тутуу ыытылынна. Сахабыт сирин бары муннуктарыттан 80 кэриҥэ видео кэлэн, олус астынныбыт, маннык ыччаттаахпыт тухары омукпут кэхтибэт кэскиллээх диэн итэҕэйдибит. Бүгүн кыттааччылары "Бэлэм буол+" саайт @belembuol инстаграм туонатыгар таһаардыбыт.
Саха оҕолоро бу күрэскэ кыттаннар, кыттааччылары көрөннөр, омук буолар уратыларын үчүгэйдик өйдөөтүннэр, төрөөбүт тылларынан холкутук саҥара үөрэнниннэр, үрдүк таһымнаах видеолары уһула турдуннар диэн, кыайыылааҕы куоластааһын нөҥүө буолбакка дьүүллүүр сүбэ көмөтүнэн быһаарыахпыт.
Дьүүллүүр сүбэ,сарсын күн устата үлэлээн, олунньу 13 күнүгэр кыайыылаахтары ааттыаҕа. Кыайыылаахтар "Алмазкредитсервис" тэрилтэттэн уонна "Азбука" маҕаһыынтан бириис тутуохтара.
Сахабыт сирин олохтоохторун @belembuol инстаграм туонатыгар киирэн төрөөбүт тылларын таптыыр, омуктарынан киэн туттар кырачаан кыттааччыларга сэҥээриктэ туруоран, үтүө тылгытын анаан өйүүргүтүгэр ыҥырабыт!
Сэҥээриилэр
арылхай харахтаах!!!