Бу иннинээҕи күн 2300 киһи ыалдьыбыта биллэр.
Суукка иһигэр өрөспүүбүлкэ лабаратыарыйаларыгар саҥа хоруона вируһун булууга 3635 чинчийии оҥоһуллубут. Хамсык саҕаланыаҕыттан 2 079 111 тиэст чинчийиллибит.
Ордук элбэх киһи Дьокуускай куоракка ыалдьыбыт – 628. Оттон үтүөрбүт киһи ахсаана – 3744.
Федеральнай суһал ыстаап киинэ иһитиннэрэринэн, олунньу 13 күнүнээҕи туругунан, 172 киһи балыыһаҕа киирбит. Оттон өрөспүүбүлүкэтээҕи суһал ыстаап киинэ иһитиннэрэринэн, ааспыт сууккаҕа саҥа ыалдьыбыт дьонтон 56 киһи балыыһаҕа киирбит.
Биллэрин курдук, олунньу 11 күнүгэр Саха сиригэр хамсык хааччахтара сымнаабыттара. Айсен Николаев саҥа уурааҕынан, атыы-эргиэн кииннэригэр киириигэ QR-куот көрдөөбөт буолбуттар. Маны таһынан, уоппуска эбэтэр өрөбүллэр кэннилэриттэн үлэҕэ тахсыыга ПЦР уонна ИХА-тиэст ирдэбилэ тохтообут.
Сахабыт сирин үрдүнэн эрэстэрээннэр, кафелар, остолобуойдар, буфеттар, баардар, банкыатынай саалалар уонна даҕаны атын уопсастыбаннай аһылык тэрилтэлэрэ түүн 00.00 чааска диэри үлэлиир буолбуттара.
