Аар саарга аатырбыт, венециятааҕы карнабаалы ыытыы хамсык саҕаланыаҕыттан, тохтотуллубута. Ол эбэтэр, 2 сыл иһигэр бу суон сураҕырбыт Италия бырааһынньыга олохтоохтор тыыннарын-быардарын хаайан, ыытыллыбакка сылдьыбыта. Санатар буоллахха, олунньу 11 күнүттэн бу судаарыстыбаҕа таһырдьа маасканы кэтии ирдэбилэ көтүрүллүбүтэ. Онон, бу күннэртэн саҕалаан, Венецияҕа карнабаалы ыытыы көҥүллэммит. Эгэлгэ маскарааттары кэппит дьон бөҕө тоҕуоруһа мустубут, сокуон үлэһиттэрэ этэллэринэн, уопсайа барыта 50 000 киһи кыттыыны ыла сылдьар.
Venezia Today саайка суруллубутунан, субуотаттан саҕаламмыт карнабаал бастакы икки күнэ олус ситиһиилээхтик ааспыт. Тыйаатырдар көрөөччүлэри таһырдьа эгэлгэ туруорууларынан үөрдүбүттэр. Оттон, бу кэлэр күннэргэ даҕаны Венеция уулуссалара мимнарынан, клоуннарынан, артыыстарынан, муусукааннарынан уонна кэпсээнньиттэринэн толору буолара күүтүллэр.
Венеция Улахан ханаалыгар (уу ханаала) чаҕылхай көстүүлээх гондол диэн бараат ааспыт. Ол эрээри, чааһынай гондуоллары, хамсык сорох хааччахтарынан сибээстээн, кытыыны ылалларын боппуттар.
Бу ураты тэрээһиннэр Италияҕа кулун тутар 1 күнүгэр диэри ыытыллыахтара. Ол да буоллар, күн бүгүҥҥээҥҥэ диэри өссө туох буолуохтааҕа чопчу биллибэт. Тэрийээччилэр быһа холоон бырагырааммаларын оҥорбуттар, онно сурулларынан, уулуссаларга өссө да элбэх испэктээхтэр, туруоруулар, куонкурустар уонна маастар-кылаастар ыытыллыахтаахтар. Ити эрээри, ханнык баҕарар түгэҥҥэ уларыйыы буолан хаалан туруон сөп.
Устуоруйаны хасыһар буоллахха, Венециятааҕы карнабаал 1000 сыл устатын тухары ыытыллыбыт былыргы, үгэс буолан хаалбыт Италия норуотун бырааһынньыга. Дьиҥинэн, былыр бастаан ыытылларын саҕана, бу тэрээһин олус атына эбитэ үһү. Оттон маскарааттары кэтии XIII-XIV үйэлэргэ олохтоммут, конфеттины буоллаҕына, XVI үйэҕэ айбыттар.
Бу сүдү бырааһынньык кулун тутар 1 күнүгэр, олохтоохтор этэллэринэн, “арыылаах-сыалаах оптуорунньукка” түмүктэниэхтээх. Дьэ, карнабаал тиһэх күнүгэр, улуу Пасха постун иннинэ, сыалаах эт эгэлгэтин сиэн хаалар кыах үөскүүр эбит.
Арба даҕаны, «карнавал» диэн тылбыт эти кытта сыһыаннаах, ол эбэтэр «эти кытта бырастыылаһыы» диэн өйдөбүллээх эбит.
Ылыллыбыт сигэтэ: https://rg.ru/2022/02/14/v-veneciiu-posle-dvuhletnego-pereryva-vernulsia-karnaval.html
