Ааспыт күннэргэ Дьокуускайга саҥа хоруона вируһунан ыалдьыы 57,5%-н аччаата. Хамсык туруга салгыы бу курдук тупсан бардаҕына, хааччахтар «сымныахтарын» сөбүн туһунан Айсен Николаев телеграм-ханаалыгар иһитиннэрэр.
«Өскөтүн бу курдук хамсык туруга тубустаҕына, нэдиэлэ бүтэһигэр, баҕар, сорох хааччахтары устуохпут», - диэн Айсен Николаев суруйар.
Кини этэринэн, өрөспүбүүлүкэ оройуоннарыгар хамсык көрдөрүүтэ эмиэ 9,3% аччаабыт. Маны таһынан, үтүөрбүт дьон ахсаана элбээбит – 4329 буолбут. Ол эрээри, реанимацияларга сытан эмтэнээччи ахсаанын көрдөрүүтэ түспэт – 115 эбит. 25 киһи ИВЛ аппараакка холбонон сытар.
Олунньу 16 күнүнээҕи туругунан, Саха сиригэр 1354 саҥа хоруона вируһунан ыалдьыбыт киһи баара биллибит.
«Дьокуускайга балыыһаҕа киирээччи ордук элбэх эбит, маны сэргэ, Мэҥэ-Хаҥалас уонна Мииринэй улуустарыгар көрдөрүү эмиэ улахан», - диэн Ил Дархан бэлиэтээбит.
Кини бэлиэтээн эппитинэн, өрөспүүбүлүкэҕэ быһыыны ылыы мөлтөх эбит. Ордук чуолаан Дьокуускай, Нерюнгри, Алдан уонна Өймөкөөн улуустара хаалан иһэллэр эбит.
«Мантан сылтаан, билиҥҥитэ, өрөспүүбүлүкэҕэ 70 % буолбут кэллэктиибинэй иммунитет олохсуйуутун таһыма кыччыан сөп» - диэн Айсен Николаев этэр.
Санатар буоллахха, олунньу 11 күнүгэр Саха сиригэр хамсык хааччахтара сымнаабыттара. Айсен Николаев саҥа уурааҕынан, атыы-эргиэн кииннэригэр киириигэ QR-куот көрдөөбөт буолбуттара. Маны таһынан, уоппуска эбэтэр өрөбүллэр кэннилэриттэн үлэҕэ тахсыыга ПЦР уонна ИХА-тиэст ирдэбилэ тохтообута.
Сахабыт сирин үрдүнэн эрэстэрээннэр, кафелар, остолобуойдар, буфеттар, баардар, банкыатынай саалалар уонна даҕаны атын уопсастыбаннай аһылык тэрилтэлэрэ түүн 00.00 чааска диэри үлэлиир буолбуттара.
