Арассыыйа бэрэсидьиэнэ В. Путин олунньу 24 күнэ үүнэр түүн Донбасска үөскээбит балаһыанньанан, анал байыаннай операцияны саҕалыырга бирикээс биэрдэ.
Кини анал операция ХНТ Устаабыгар уонна Донецкай, Луганскай өрөспүүбүүлүкэлэри кытта түһэрсиллибит дуогабардарга тирэҕирэр, кинилэр көмө көрдөөбүттэринэн ыытыллар диэтэ. Кини Донбасс олохтоохторун утары Киев эрэсиимэ 8 сылы мэлдьи геноцид ыытан кэлбитин көмүскүөхтээхпит диэн эттэ.
Операция сүрүн сыала - Украинаҕа демилитаризация уонна денацификация ыытыы. Ол аата Украина сэриитимсийэрин тохтоторго, сэриитин сэбин суох оҥоруохтаах уонна нацистары, фашистары уодьуганныахтаах. Ону таһынан, Арассыыйа гражданнарын, эйэлээх дьону утары оҥорбут буруйдаахтар эппиэккэ тардыллыахтаахтар. Путин инники “Одессаҕа профсоюзтар дьиэлэрин уматан, кимнээх элбэх дьону буруоҕа тумнаран өлөрбүттэри ааҕан билэбит, эпппиэттиэхтээхтэр” диэбитэ. Итинник элбэх буруйдаах нацистары тутаттыыллара буолуо.
Путин “Арассыыйа аан дойду биир саамай күүстээх ядернай сэрии сэптээх судаарыстыбата буолар, онон биһиэхэ саба түспүт ыарахан харданы ылыаҕа, оттон ойоҕоспутугар Украина курдук кутталлаах дойду баара сайдарбытын мэһэйдиир” диэн сэрэттэ.
Арассыыйа Украинаны сэриилээн ылар санаата суох, онон кини “Украина байыаннайдарын сэриилэһимэҥ, сааҕытын ууран дьиэҕитигэр тарҕаһыҥ” диэн ыҥырда.
Сарсыарда 5 чаас ааһыытыттан Украина улахан куораттарыгар Киевка, Николаевка, Харьковка, Одессаҕа, Мариупольга күүстээх дэлби тэбиилэр иһиллэллэр диэн сонуну тарҕатар тэрилтэлэр иһитиннэрэллэр. Ити байыаннай ыскылааттары, баазалары ытыалыыллар, буомбалыыллар эбит. Билиҥҥитэ спецназ уонна авиация үлэлиир дииллэр. Мариуполь, Одесса диэкинэн десант киирбит. Сураҕа, Мариуполынан Одессаҕа, Приднестровьеҕа тиийэ көрүдүөр оҥоһуллуохтаах. Араас сурах-садьык информация элбэх.
Арассыыйа анал операцияны саҕалаабытын кэннэ, Киевкэ билигин Украина суута тутан олорор Арассыыйа диэки санаалаах Виктор Медведчук дьиэтигэр элбэх дьокутаат, байыаннай мустубут үһү. Былааһы кырдьык Медведчукка биэриэхтэрин сөп. Бэрэсидьиэннэрэ Зеленскэй дьиэ кэргэнин куоттарбыт, бэйэтэ да куотара буолуо.
Биһиэннэрэ 2008 с. Грузияны эйэҕэ күһэйбиттэрэ, итинник Сирияҕа үлэлиир улахан уопуттаахтарын көрдөрбүттэрэ. Украинаҕа нацистары, сэриитимсийээччилэри уодьуганнаан, сэриитимсийбэт, НАТО диэки барбат былааһы олохтоон баран тахсаллара буолуо.
Туох буоларын биллэрэн иһиэхпит. Саайпытын көрөөрүҥ.
Владимир Степанов.
