Саха сирин Ил Дархана Айсен Николаев уонна Крым баһылыга Сергей Аксенов «Предгорнай» санаторий Саха Өрөспүүбүлүкэтин бас билиитигэр бэриллэрин туһунан меморандум түһэристилэр.
«Бу биһиэхэ олус улахан суолталаах меморандум Крымы кытта олохтоммут үтүө сыһыан олоххо киириитин биир көстүүтэ буолар. Өрөспүүбүлүкэбит Ялтаттан чугас Алупкаҕа үлэлии турар санаторнай-курортнай сынньалаҥ эбийиэктэрин бас билиигэ ылла. Онон, сотору кэминэн бу комплекска, бастатан туран, Саха сирин оҕолоро доруобуйаларын бөҕөргөтө барыахтара. Биллэрин курдук, Крым соҕурууҥҥу кытыла аан дойдуга ураты эмтээх айылҕалаах сир буолар», - диэн Айсен Николаев этэр.
Крым баһылыга Сергей Аксенов меморандумҥа илии баттыыр үөрүүлээх тэрээһиҥҥэ Саха сирин кытта доҕордуу сыһыан салгыы сайдыан баҕарарын эттэ.
Маны таһынан, салайааччылар 2015 сыллаахха СӨ бырабыыталыстыбатын уонна Крым республикатын икки ардыларыгар олохтоммут "Торговай-экономическай, научнай-техническэй уонна социальнай-культурнай хайысханан үлэлэһии сөбүлэҥин" олоххо салгыы киллэрии туһунан кэпсэттилэр.
