2024 сылга хас биирдии Саха сирин олохтооҕо биир кэлим Судаарыстыбаннай өҥө (Госуслуги) порталыгар, «Мое здоровье» диэн тус кабинетын нөҥүө электроннай мэдиссиинискэй каартатын көрөр кыахтаныаҕа. Субу маннык биир кэлим сыыппара куонтурун оҥоруу доруобуйа харыстабылын үлэтин тупсарыахтаах. Көрдөрүнээччи биир кэлим Судаарыстыбаннай өҥө порталыгар баар «Мое здоровье» диэн тус кабинетыгар мэдиссиинэ араас өҥөтүн ылар кыахтаныаҕа. Ол курдук, хас биирдии киһи бырааска суруттарар, бырааһы дьиэҕэ ыҥырар, диспансеризацияҕа (проф.осмуотурга) суруттарар, мэдиссиинэ өҥөтүн сыанатын билэр уонна мэдиссиинэҕэ сыһыаннаах докумуоннарын көрөр кыахтаныаҕа.
Олунньу 25 күнүгэр ыытыллыбыт Өрөспүүбүлүкэ бырабыыталыстыбатын мунньаҕар, Саха сирин олохтоохторугар өҥөнү тупсарар соруктан, эрэгийиэннээҕи доруобуйа харыстабылын мэдиссиинискэй, информационнай систиэмэтин туһунан балаһыанньа бигэргэннэ. Маныаха, эрэгийиэннээҕи систиэмэ биир кэлим федеральнай информационнай систиэмэлиин силбэһиэ.
«Бу – хас биирдии киһи төрүөҕүттэн саҕалаан доруобуйатын туругун дааннайдарын хранилищета. Биир кэлим информационнай систиэмэҕэ туох баар информацияны кэтээн көрөр буолуохпут уонна киһи төрүөҕүттэн хара өлүөр диэри, ханна сылдьарыттан тутулуга суох, дааннайдарын көрөр кыахтаах буолуоҕа. Маны сэргэ, информационнай систиэмэ мэдиссиинэ үлэһиттэрин пациент дааннайдарын толорор сылаалаах үлэлэриттэн босхолуо», - диэн Бырабыыталыстыба вице-премьера Ольга Балабкина быһааран биэрдэ.
Холобурдаан этэр буоллахха, улуустан киин куоракка эбэтэр олох даҕаны атын эрэгийиэҥҥэ көһөр буоллахха, бэликилииникэттэн тиийэн мэдиссиинискэй каартабытын көрдөөн, ыспыраапкалары ирдээн, саҥа сиргэ сыстан биэрии иһин сайабылыанньа толорон, докумуоннары көрдөөн сордоммот буолуохпут.
Хас биирдии киһи мэдиссиинэ тэрилтэтигэр тиийэ сылдьыбытын туһунан дааннайдара, туттарбыт анаалыстарын, бэликилииникэҕэ, стационарга көрдөрбүтүн, ханнык процедуралары, чинчийиилэри ааспытын, ыспыраапкалар, мэдиссиинискэй түмүктэр уонна ырысыаптар тустарынан информация барыта пациент электроннай каартатыгар баар буолуоҕа.
Саха сирин Доруобуйаҕа харыстабылын миниистирэ Лена Афанасьева этэринэн, бүгүҥҥү туругунан, 540 территорияҕа салаалардаах уонна 218 биэлсэр пууннардаах 55 мэдиссиинэ тэрилтэтэ бу систиэмэҕэ холбоммут.
«Бу 2022 сылга сүрэх-тымыр уонна онкология ыарыыларыгар мэдиссиинискэй көмө өҥөтө, «Акушерство уонна гинекология», «Неонатология» профиллара, хат дьахталлар мониториннара бу систиэмэҕэ холбонуохтаах улахан үлэтэ бара турар», - диэн миниистир даҕатан эттэ. Маны таһынан, телемедиссиинискэй консултаассыйаны ыытыы хаҥыахтаах.
Маннык систиэмэни «Доруобуйа харыстабыла» бырайыак чэрчитинэн, Саха сиригэр 2019 сылтан киллэрэн саҕалаабыттара. Миниистир салгыы кэпсииринэн, бүгүҥҥү күннээххэ бу систиэмэ көмөтүнэн пациеннар ботуоктарын салайан үлэлэтиэххэ сөп (бырааска электроннай уочарат уонна диспансеризация, бырааһы дьиэҕэ ыҥырыы, мэдиссиинэ консултаассыйатын онлайн ылыы). Маны сэргэ, билигин бу систиэмэ нөҥүө чэпчэтиилээх эми-тому ылыахха, суһал көмөнү уонна санавиацияны ыҥырыахха сөп. Систиэмэҕэ мэдиссиинискэй ойуулар Киин архыыптара, ол эбэтэр эрэнгиэн, флюорография синиимэктэрэ, лабаратыарыйа чинчийиилэрэ уонна электроннай мэдиссиинэ каартата киирбиттэрэ.
СӨ Ил Дарханын уонна СӨ Бырабыыталыстыбатын Пресс-сулууспатын уонна Саха сирин Доруобуйаҕа харыстабылын инфографикатын матырыйаалларыттан
