Өссө 2014 сыллаахха буолбут Украина сэриититтэн куотан, балачча киһи Мииринэй оройуонугар хорҕойбута. Бу да сырыыга дьон куотан кэлэр түгэнигэр Мииринэй былаастара көмөлөһөргө бэлэмнэр.
Ити туһунан, оройуон баһылыга Александр Басыров, дьаһалта пресс-сулууспатын нөҥүө олунньу 26 күнүгэр биллэрбитэ.
Даҕатан эттэххэ, аҕыс сыл аннараа өттүгэр кэлбит Донбасс дьоно Мииринэй куоратыттан, Айхалынан Удачнайга тиийэ тарҕанан олохсуйбуттара.
Кинилэртэн сорохторо шахта, хайа үлэтигэр идэтийиилээх буоланнар, Мииринэй-Ньурба ХБК-гар, "Удачнай" рудникка, Айхаллааҕы ХБК-га билигин да үлэлии сылдьаллар. Олорго хамнас үрдүк.
Уопсайынан, үлэһит чааһынан сүрдээх туруу дьон эбиттэр.Шахтаҕа үлэ булбатахтарына сантехниктыыллар, элиэктириктииллэр, таксистыыллар. Тугу барытын сатыыллар.
Бу дьонтон балачча киһи, алта-сэттэ сыл устата үп-харчы мунньунан, Арассыыйа соҕуруу уобаластарыгар барыталаатылар. Үксүн Ростовы, Краснодары талаллар. Донбасстан, бастакы сэрииттэн күрэнэн кэлбит дьон, Мииринэйгэ улахан өйөбүлү ыллылар. Оҕолорун МПТИ-гэ, МРТК-ка үөрэттэрдилэр. Үлэнэн харыыта суох хааччыйдылар. МПТИ-гэ үөрэнэ киирбит икки игирэ кыыһы саха норуодунай "Кустук" ансаамбылыгар ылбыттара. Кинилэртэн биирдэстэрэ-хайыы-үйэ ыал. Донбасс ыччаттара, олохтоох Мииринэй украинецтарын кытары доҕордоһон, үгүс саҥа дьиэ кэргэн үөскээтэ.
Сити курдук, Донбасстан кэлэр дьон атын сирдэрдээҕэр промышленностаах сирдэргэ табыллаллар эбит.
Станислав Алексеев. Мииринэй куората.
