Маннык чахчыларынан, Өрөспүүбүлүкэ хоруона хамсыгын утары охсуһар Суһал ыстаабын иһитиннэриилэриттэн сирдэтинэбин.
Тохсунньу ыйы кытары тэҥнээтэххэ, Мииринэй оройуонугар суостаах дьаҥ “хаамыыта” олунньу ыйга «олустаата».
Бу дьыл, тохсунньутугар 565 киһи хоруона хамсыгар ылларбыта.
2022 сыл олунньутун устата ковидынан ыалдьыбыт ахсаана – 2 506 киһи. Ыарахан сыыппара!
Мин, икки сыллааҕыта, Мииринэйдээҕи ковид госпиталыгар балачча өр сытаммын, бу ыарыы амырыынын эппинэн-хааммынан билэбин.
Ыарыһахтар хоруона хамсыгар ыллардахтарына цитокиновай «буурҕаттан” ордук эрэйдэнэллэр. Оннукка түбэһэн турабын.
Цитокиновай «шторм» диэн тугун өссө төгүл быһааран биэриим.
Сүрэх, уйулҕа ыарыһахтар, астмалаахтар, бастакы уонна иккис группалаах саахар диабеттаахтар, үрдүк дабылыанньалаахтар, бастакы-иккис группа энцефалопатиялаахтар, вегето-сосудистай дистониялаахтар олус эрэйдэнэллэр. Тыыннара хаайтарар.
Хаамтахтарына мэйиилэрэ эргийэр. Тахсан киирэ бараллара да – тоҕус муҥ. Куруук хааннаах сыптарыҥ. Тоҕо диэтэххэ антибиотиктаах система дьайар. Өссө дьон муннулара тыбыырар.
Сорохтор өйдөрүн сүтэрэллэр. Аһамньылара мэлигир, сүрэхтэрэ өлөхсүйэр, хотуолууллар. Кыраадыстара түһэн биэрбэтэ, түлэкэдийиилэрэ, кыайан утуйбаттара сэбиргэхтэтиилэрин күүһүттэн тутулуктаах.
Тус бэйэбин, тыҥам 40-ча бырыһыана сиэнэн, агдакам бобуччу тутан кэбиһэн, кыайан турбат да олорбот да буолан хаалбытым. Кыраадыһым 39-тан төрүт түспэт этэ. Уонча күн үрдүкү кыраадыстаах «куух-хаах» сылдьыбытым. Аны, балыыһа итиикэтэ, салгын тиийбэт буолан киһи утуйбат соро.
Бүтэр уһугар, утуйа уум оннугар түлэкэдийии буолан барбыта. Түҥ-таҥ, кэлээскэҕэ соһуллан, лиибинэн аллараа этээскэ түһэрэннэр КТ-га иккитэ түспүтүм. Онно тыҥаҥ кэбирэниитэ улаатан иһэр диэбиттэрэ. Өлөөрү гынным диэн ыксаабытым.
Ковид госпиталын сэбиэдиссэйин Саргылаана Станиславовна Бурнашеваны системабын элбэтиҥ, күүстээх укуолла биэриҥ диэн көрдөспүтүм.
Саргылаана Станиславовна уонна быраастар Семен Семенович, Александр Львович тиринни иһинэн («Подкожно») артиллегия диэн күүстээх укуолу биэрэннэр быыһаабыттара.
Реанимацияҕа, тыҥабын ускуустубаннай бэнтилээссийэҕэ холбуулларыттан өрөһүммүтүм.
Кыраадыһым сыыйа түһэн барбыта. Агдакам хаба тутара уурайбыта. Тыҥам уоскуйарга барбыта.
Эмчиттэр – Лена Литовченко, Александр Черепанов, Ньургуйаана, Раиса, миигин, кыһамньылаахтык бүөбэйдээннэр бэттэх кэлбитим. Мин кинилэргэ махталым – муҥура суох.
Аҕыйах хонугунан палаата иһигэр, көрүдүөргэ хаамар, анал тутаахтан тутуһан тахсан киирэ барар буолбутум.
Оттон тыҥаларын бааһырыыта 60-70 бырыһыаҥҥа тиийбит дьону реанимацияҕа, ИВЛ аппарааттарыгар холбууллар. Ол ынырык сиргэ тулуйар киһи тулуйар. Саха сиригэр, үгүс дьону, бу ыарахан дьаҥ Орто Дойдуттан күрэттэ.
Бука диэн, маны учуоттаан туран, хайдах кыалларынан бу амырыын дьаҥтан сэрэниҥ, харыстаныҥ. Вакцинацияны, ревакцинацияны көтүтүмэҥ.
Станислав Алексеев, Мииринэй куората.
МЦРБ саайтан ылыллыбыт хаартыскаҕа - быраас Саргылаана Бурнашева.
