Киир

Киир

Олунньу 25 күнүгэр Москуба куоракка Саха сирин бэрэстэбиитэлистибэтигэр Ийэ сылыгар туһуламмыт «Ийээ, мин эйигин таптыыбын!» диэн аахсыйа үөрүүлээхтик биллэриллибитэ. Бу аахсыйаны «Ил Түмэн» бэчээт дьиэтэ уонна «Арассыыйа почтата» АУо саха сиринээҕи салаата кыттыһан тэрийдилэр.

Тэрийээччилэр  толкуйдарынан, Саха сириттэн киин куораттарга үөрэнэ сылдьар устудьуоннар уонна Уһук Илиҥҥи байыаннай уокурукка сулууспалыы сылдьар саллааттар ийэлэригэр кэрэ көстүүлээх открытканы почта нөҥүө босхо ыытар кыахтаннылар. Открытканы Ийэ сылын логотибынан  киэргэттилэр. Аахсыйа сэтинньи ыйга диэри ыытыллар. Бэриллибит түгэни дойдуларыттан ыраах сылдьар устудьуоннар номнуо туһанан ийэлэрин үөрдэн эрэллэр.  

396c35a6bbf87f211bdedf1c7da553279d825840

Москубаҕа саха ыччатын «АйТал» уопсастыбаннай түмсүүтүн салайар Артем Инхеев, Новосибирскайга саха ыччатын ассоциациятын салайар Айна Арбыкина,  Екатеринбурга  биир дойдулаахтар түмсүүлэрин салайар Арина Дарбасова, Владивостокка саха ыччатын ассоциациятын салайар Нарыйа Ушницкая, маннык аахсыйа тэриллибититтэн олус үөрэллэрин этэн тураннар, устудьуоннары уонна саллааттары ийэлэргитин эҕэрдэлиир түгэни эһиги эмиэ туһаныҥ, мүлчү тутумаҥ диэн ыҥыраллар.

Аахсыйаны СӨ Ил Дархана Айсен Николаев эмиэ өйөөтө. Кини ол туһунан бэйэтин инстаграм ситимигэр маннык суруйбут:

4b5562ba 7f6d 444a 8eaf db06d651c0e1

«Билигин дойдубутугар уустук кэм тыҥаан турар, онон чугас дьоммутун кытта сибээспитин тута сылдьарбыт олус суолталаах. Бу дойдуларыттан ыраах үөрэнэ, сулууспалыы сылдьар оҕолоох ийэлэргэ олус суолталаах.  «Ил Түмэн» бэчээт дьиэтэ «Арассыыйа почтатын» кытта кыттыһан тэрийбит «Ийээ, мин эйигин таптыыбын!» аахсыйата чопчу бу кэмҥэ түбэһэн, олус тоҕоостоох буолла уонна суолтата өссө улаатта. Мин бу аахсыйаны өйүүрбүн биллэрэн, ийэбэр Москубаттан аахсыйа открыткатын ыыттым. Илиинэн суруллубуту тутар быдан күндү уонна долгутулаах эбээт?»  

«Ил Түмэн» бэчээт дьиэтин салайааччыта, норуот дьокутаата Мария Христофорова аахсыйа логистикатын бэйэтигэр ылбыт «Арассыыйа почтата» тэрилтэҕэ, өйөбүл буолбут Нерюнгри таас чоҕу хостуур  «Колмар» тэрилтэтигэр, Мииринэй куорат типографиятыгар уонна Ил Дархан Айсен Николаевка махталын биллэрэр.

Тарҕат:

Санааҕын суруй