Бу күннэргэ социальнай ситими, интэриниэт өҥөтүн элбэхтик туһанар дьон бииртэн биир соһуччу сонуну ааҕаллар. Тас дойдуттан өҥөнү оҥорооччулар сорохторо, бэйэлэрэ кэккэ харгыстары көрсөннөр күһэллэн, сорохторо бэлиитикэни утаран маннык тиийдилэр.
Ол курдук, бүгүн эдэрчи дьон, ыччат, оҕо аймах сөбүлээн көрөр “Тik Ток” социальнай ситим Фейк туһунан сокуон киирбитинэн, видео угар уонна быһа эпииргэ тахсар өҥөтүн биллибэт болдьоххо тохтотто. Манна Арассыыйа үрдүнэн икки сыллааҕыта быһа холуйан 25 млн туһанааччы баара биллэрэ.
Оттон муусука бокуолуонньуттара киэҥник туһанар “Spotify” сиэрбис Москубатааҕы офиһын саппытын уонна баан эйгэтигэр хааччахтар киирэннэр, төлөбүр харгыстанар буолан, Premium сурутууну тохтоппутарын туһунан иһитиннэрэр. Инники холбоммут сурутуулар болдьохторо бүтүөр диэри үлэлиэхтэрэ диэн эрэннэрэллэр. Манна 2021 сыл көрдөрүүтүнэн, 1,6 млн сурутааччы баара.
Тас дойду киинэтин дьиэҕэ олорон сөбүлээн көрөөччүлэр “Netflix” сиэрбис Арассыыйаҕа үлэлээн бүппүтүн туһунан сонуну соһуйа иһиттилэр. 2019 с. манна сурутааччы ахсаана нэһилиэнньэ ахсаанын баһыйда диэн иһитиннэрии баара, ол эбэтэр 148, 9 млн. Тэрилтэ бу быһаарыыны Украинаҕа буола турар байыаннай дьайыылары кытта сөбүлэспэтин бэлиэтигэр ылыммыт.
Онон бүгүн элбэх киһи бу сиэрбистэри сүтүктээбит уонна тугунан солбуйар туһунан улахан толкуйга түспүт буолуохтаах.
