Мииринэй оройуона – дьиҥ-чахчы ырыа туоната.
Кылыһахтаах куоластаахтар, сайдар талааннар үөскүүр сирдэрэ
Аҥаардас “Туой Хайа” ырыа күрэһэ төһөлөөх чаҕылхай талааны Саха сиригэр бэлэхтээбитэ буолуой?!
Ангелина Файрушина, Лэгэнтэй, Тамара Попова, Сиэйэ Уола, Ника, Умсуура, Ваня Потапов!
Оройуоммут иһигэр да талааннары ылан көр!
Сахалыы ыллыыр уонна төрөөбүт тылларынан ырыа айар ыччаттар промышленнай оройуоҥҥа бааллара дьону-норуоту сөхтөрөр.
Холобурдаан эттэххэ, Садын (Спиридон Саввинов) Сүлдьүкээртэн төрүттээх, «Анаабыр алмаастара» хампаанньаҕа баахта ньыматынан үлэлиир. Талааннаах уол ырыаларын Саха араадьыйатыгар үгүстүк истэбит.
Садын уйулҕаны таарыйар ырыалара ыччакка да аҕам саастаах дьоҥҥо да сүрдээҕин сөбүлэтэллэр.
Оттон Николай Никифоров эмиэ Сүлдьүкээртэн төрүттээх.
Бу эдэр киһи Ютьюбка балачча элбэх «лайк » ылла. Быһа холуйан 300-чэ тыһыынча сурутааччылаах. Бэрт көрдөрүү.
Николай бэйэтин видеоклиптарын атыттарга маарыннаабат, ураты гына оҥороро кэрэхсэбиллээх.
Ити курдук, талааннар үксүү тураллар.
Онон, Мииринэйгэ саха ырыатын салгыы чэчирии сайыннарарга, саҥа талааннары «уһугуннарарга” тоҕоостоох кэм кэлбит дии саныыбын.
“Тет-а-тет” диэн ааттаах “АЛРОСА” КСК-тын саҥа бырайыага сахалыы ырыаҕа тыыппалаах ыччакка вокалга холонууга кыах биэрэр.
Ылбаҕай ырыанан үлүһүйэр эдэр киһи манна холонуон сөп.
Удачнай куораттан саҕалаан Мииринэйгэ тиийэ, сахалыы ырыаҕа сыһыаннаах ыччаттары түмэр барыл хардыылаата.
Өскүөрүтүн эмиэ биһиэхэ сайдыбыт «Чуона», « Туой Хайа» добун ырыа барыллара сайдан саха эстрадата сайдыытыгар төһүү буолбут буоллахтарына «Тет а Тет» бырайыак син – биир оннук оҥкуллаах, сыаллаах-соруктаах.
Онон, ырыа-тойук аргыстаах Мииринэй оройуонун ыччаттара бэйэҕитин саҥа бырайыакка холонуҥ.
Удачнай - “Кристалл”, Айхал - “Северное сияние”, Мииринэй - “Алмаас”, Арыылаах - “Туой Хайа” култуура дьиэлэригэр, эһигини талааннаах эдэр дьону күүтэллэр.
Станислав Алексеев. Мииринэй куората. Ааптар хаартыската.
