Бу күннэргэ Мииринэй куорат бородууктатын маҕаһыыннарыгар сыана эмискэччи ыараата. Аҕыйах күн иһигэр балысханнык ыараабыт саахары батарыыга ханнык да хааччахтааһын суох. Төһөнү баҕарар атыылаһыаххын сөп. Ити билиҥҥитэ. Сарсын тугунан диэлийиэн туруо биллибэт. Оттон кууһунан атыылыыр биир-икки лааппыларга саахар мэлигир.
Ортотунан ыллахха, Мииринэй куорат маҕаһыыннарыгар бүгүҥҥү сыаналар манныктар: «кумах» саахар киилэтэ – 140-150 солк, биэс киилэлээх мөһөөччүктээх саахар – 700 солк, гречка – 145-150, “Крупяной двор” ириис куруппата(800 грамм) – 145, “Золото Таиланда” ириис куруппата(900 грамм) – 200, килиэп – 60, ынах арыыта – 800, лиитэрэ мас арыыта – 200, сымнаҕас сыыр – 800, мокоруон(спагетти) – 150, ынах этэ - 600, бараан этэ – 700 , сибиинньэ этэ – 700, сибииинньэ тууһаммыт сыата – 1.100 солк, киилэ фарш(ынах этиттэн) – 635, Нерюнгри кууруссатын «кынаттара»(«крылышки») - 350, уон устуука сымыыт – 95, ынах арыыта – 800, тууhаммыт форель – 1.400 солк(1 киилэ), тууһамматах форель – 1.100 солк, тууччах балык – 1.400(1 кг), чыыр – 750 – 1.100 солк, муксуун – 750 солк, күндүөбэй – 300 солк, быраҥаатта – 300 солк, сыалыһар – 250 солк, сордоҥ – 200 солк, собо – 280 солк, хортуоппуй – 90, хаппыыста - 90, моркуоп - 90, виноград - 400-600, груша – 380-400, дьаабылыка – 200-250, «Активиа» бифидум-йогурт(125 грамм) – 65-70 солк сыаналаахтар.
Тутуу баттаһан хаһааммыт хаһаанна, хойутаабыт хойутаата. Биир сонунум диэн - баара-суоҕа ый аҥаарынан Мииринэйгэ Усть-Куттан ас-таҥас тиэнэр аартыкпыт сабыллар. Соччото суох дьыала. Мантан салгыы ас-табаар сыаната өссө ыарыыра сабаҕаланар. Муус устар ый саҥатыттан суол сабылыннаҕына, аныгыскы кыһыҥҥы суол 2022 сыл ахсынньы 20 күннэригэр эрэ аһыллыаҕа.
Онон, бэс ыйын саҥатыгар Өлүөнэ өрүһүнэн навигацияны эрэ күүтэбит. Онуоха диэри туох баар хааччыллыыбыт – сөмөлүөтүнэн эрэ.
Станислав Алексеев. Мииринэй куората.
