Бу күннэргэ Ил Дархан Айсен Николаев нэһилиэнньэ дохуотун өйүүр уонна эминэн-томунан хааччыллыы туһунан мунньахтаата. 2022 с. Саха сиригэр нэһилиэнньэ кэккэ араҥатын эминэн хааччыйарга 2,6 млрд солк. көрүллүбүтэ. Онтон 78 %-нын өрөспүүбүлүкэ, 22 %-нын – федеральнай киин уйуммута. Ити туһунан СӨ Доруобуйа харыстыбылыгар миниистирэ Лена Афанасьева кэпсиир.
Кулун тутар 1 күнүнээҕи туругунан, “Наадалаах эминэн хааччыйыы” федеральнай бырагыраама чэрчитинэн барыта 40,47 мөл. солк. суумалаах 16 937 эмп ырысыабын суруйан биэрбиттэр. Биир ырысыап, ортотунан, 2 405,46 солк. сыаналаах. Эмиэ ити күннээҕи инвентаризация чахчыларыттан көрдөххө, 51,95 мөл. солк. суумалаах табаар кэлбит. 318,48 мөл. солк. суумалаах табаар саппааһа баар (10 ыйга тиийэр).
Кулун тутар 1 күнүнээҕи туругунан, “14 улахан ороскуоттаах нозология” федеральнай бырагыраама чэрчитинэн, барыта 47,42 мөл. солк. суумалаах 235 ырысыабы суруйан биэрбиттэр. Биир ырысыап, ортотунан, 201 787,40 солк. сыаналаах. Барыта 120,97 мөл. солк. суумалаах табаар кэлбит. 268,94 мөл. солк. суумалаах хаһаас баар (13 ыйга тиийэр).
Быйыл тыыл бэтэрээннэрин, реабилитациялыммыт, бэлиитикэ эрэпириэссийэтигэр түбэспит дьону – барыта 807 киһини эминэн хааччыйыахтаах өрөспүүбүлүкэ бырагырааматыгар 7,75 мөл. солк. көрүллүбүт. 10 ыйга тиийэр эмп-томп саппааһа баар.
Чэпчэтиилээх эми-тому СӨ Доруобуйа харыстыбалыгар министиэристибэтин иһинэн үлэлиир мэдиссиинэ тэрилтэлэрэ биэрэллэр. Кулун тутар 1 күнүнээҕи туругунан, барыта 322,71 мөл. солк. суумалаах 50 815 ырысыап суруллубут.
Өрөспүүбүлүкэ сэдэх ыарыылаах (орфанный) дьонун регистригэр 187 киһи киирэ сылдьар. Быйыл олорго эми-тому атыылаһарга өрөспүүбүлүкэ бүддьүөтүттэн 427 мөл. солк. көрүллүбүт. 165,94 мөл. солкуобайдаах судаарыстыба хантараага түһэрсиллибит. 3 ыйга тиийэр эмп баар.
