Киир

Киир

«Татыйыына” – сахалар бородууксуйаларын Мииринэйгэ атыылыыр үс атыы-эргиэн туочукаларыттан биирдэстэрэ.  Иэдьэгэйи, суораты,  сүөгэйи, ыаммытынан үүтү, оруос уонна курупчаакы лэппиэскэлэрин киниттэн ылан үссэнэбит

Аны аҕыйах хонугунан Сунтаар улууһун кытары айан суола сабыллан, «Татыйыына” маҕаһыын сибиэһэй бородууксуйаны аҕалыыта, аны бэс ыйыгар диэри тохтоору турар. Ааспыт нэдиэлэҕэ  «Ал-Су» хаһаайыстыбатыгар оҥоһуллубут йогурт, сүөгэй, атын үүт аһылыктар кэллилэр.  Эбиитин биһигиттэн быдан ыраах Горнай улууһуттан халадьыас аҕалбыттар. Татыйыына Мииринэй куоратыттан 170 көс ыраах,  «Бүлүү» федеральнай суолун ыксатыгар сытар «Ал-Су» («Аллыҥа – Сунтаар») пиирмэтин кытары ыкса сибээстэһэр.

Онон, мииринэйдэр Аллыҥа ыаммытынан үүттэн оҥоһуллубут бородууксуйатынан хааччылла олоробут. Маны тэҥэ,  “Татыйыына” лааппытыгар дьиэ бэлимиэнэ,  ынах этин уонна куурусса фарштара, тефтель, фрикаделькалар, кэтилиэт, гуляш(ынах, сибиинньэ эттэрэ),  сахалыы лэппиэскэ арааһыттан, “песочница”- бирээнньиктэр,  бэчиэнньэлэр,  коржиктар, мүөттээх туортар, бэрэскилэр,  расстегайдар атын бурдук аһылыктар  баар буоллулар.  Сунтаардар нуучча аатырбыт бурдук аһылыгын бэркэ диэн баһылаабыттар.  Дьон хамаҕатык атыылаһар.

Кэмпэндээйи аһылыкка туттуллар биэстии киилэлээх мөһөөччүктэрдээх тууһун мииринэйдэр тутуу  былдьаһан, харбыалаһан хаһааммыттара ыраатта. Аны 500 гр. хоруопкалаах тууһу аҕалбыттар (80 солк). Сорох дьон, бородуукта Сунтаартан бэрт кыра баартыйаларынан уонна кэмчитик кэлэр диэн мунаараллар.

Саха лэппиэскэтин дьон олус сөбүлүүр

Манна эппиэт дьэҥкэ – аһылык туттуллар болдьоҕо ааспатын туһугар кыһаллаллар эбит. Сибиэһэй бородууксуйаны аҕалар буоланнар бэйэлэрэ туспа эрэсиимнээхтэр. Мииринэйгэ аһылык  дэлэгэйэ тутахсыйан,  Мииринэй ырыынага букатын «дьүдэйдэ».

«Татыйыына» фирма үлэтин-хамнаhын сабардамын кэҥэтэригэр бары кыах үөскээтэ. Онтон-мантан хасыһан үлэтин тохтоппотохторуна.

Бэлимиэн тиэптэл кэтилиэт

Станислав Алексеев. Мииринэй куората. Ааптар хаартыскалара
Тарҕат:

Санааҕын суруй

Бүтэһик сонуннар