Тус хоту Өймөкөөн сирэ тымныытынан эрэ буолбакка, былыр-былыргыттан биллибэт адьырҕа олохсуйбут Лабыҥкыр күөлүнэн эмиэ аатырар. Номоххо киирбит турар уулаах эбэни учуонайдар кытта чинчийэллэр. Оттон олохтоохтор төрөөбүт-үөскээбит сирдэригэр ытыктабыллара үрдүк, махталлара күүстээх буолан, Лабыҥкыр күөл аата биллибэт дьиктилээхэй кыылын туһунан саҥа остуоруйаны айан таһааран нууччалыы-сахалыы тылынан көтүтэр баҕалаахтарын биллэрбиттэрэ.
Биһиги үөлээннээхпит Евдокия Семеновна Иринцеева-Огдо ону, остуоруйа ыллыгынан сиэтэн киллэрэн, үйэ тухары өйдөбүнньүк кинигэ буолар ыраны толорон, ааҕааччы киэҥ араҥатын аартыгар киллэрдэ.
Онон аны, Лабыҥкыр адьарайа диэн буолбакка, бу үйэлэр тухары баара биллибэккэ саһа сыппыт, киниттэн үөскээн кэлбит хос-хос сиэн кыыл, көрдөөх-нардаах Лаабычаан барахсан оҕо аймахха билсэргэ бэлэм буолла.
Остуоруйаҕа кэпсэнэринэн ардыгар курус, сороҕор тэбэнэттээх, мэник, ол эрээри барыны билиэн-көрүөн, куруук сайдыан баҕалаах Лаабыс-Лаабычаан, бэйэтэ этэринии, “киһилэр” оҕолоро Мэндэни кытта ыкса бодоруһар. Адьарай кыылга, балыкка да, үөҥҥэ да маарыннаабат Лаабы барахсаны Мэндэ бэйэтигэр тэҥнээн истиҥ доҕор оҥостор. Киниэхэ мэлдьи тардыһар, сүбэлиир-амалыыр, дьонтон харыстыыр. Уолаттар иккиэн бииргэ улаатар баҕалаахтар, сырдык ыралаахтар. Ону барытын уу аннынааҕы олохтоохтортон итиэннэ Орто дойду икки атахтаахтарыттан кистииллэр, үтүө сыһыаннарын олус харыстыыллар...
Бу остуоруйаны тута нууччалыы тыллаахтарга анаан, “Исповедь исчезнувших” диэн сэһэнинэн саха литературатыгар ааспыт сыллаахха бэйэтин аатын бигэтик киллэрбит Нина Дьячковская тылбаастаата.
Онон, Лабыҥкыр абааһытын сыдьаана Лаабычаан туһунан остуоруйа сахалыы уонна нууччалыы тылынан кинигэлэрин сотору кэминэн “Айар” кинигэ кыһатын маҕаһыыннарыттан атыылаһыаххыт.
Муус устар 2 күнүгэр 15 чаастан, Оҕо кинигэтин норуоттар икки ардыларынааҕы күнүн бэлиэтигэр, бука барыгытын “ЛААБЫ ТУҺУНАН ОСТУОРУЙА ҮӨСКЭЭТЭ” диэн Евдокия Иринцеева-Огдо саҥа кинигэтин эрдэттэн билиһиннэрэр, сонун биһирэмигэр ыҥырабыт.
Биһирэм Ленин проспегын 40 №-гэр СӨ Национальнай бибилэтиэкэтин историческай саалатыгар ZOOM платформа онлайн киэбинэн ыытыллыа. Баҕалаахтар онно холбоноргут көҥүл.
Zoom кэмпириэнсийэни истиэн, онно кыттыан баҕалаахтар бу ыйыынан сирдэтиҥ=
кэмпириэнсийэ идентификатора: 850 3905 6100
Киирэр код: 455855
Биисинэскэ сыһыаннаахтар Skype нөҥүө холбонуоххутун сөп :
Сэҥээриилэр