Ийэ уонна дьахтар доруобуйатыгар кыһамньы – Саха сиригэр биллэриллибит Ийэ Сылын биир төһүү соруга.
Өрөспүүбүлүкэ Ил Дархана Айсен Николаев дьаһалынан, эрэгийиэҥҥэ тус арыаллаах дьахтар доруобуйатын бырагырааммата бэлэмнэниллэр.
Мэдиссиинэ тэрилтэлэрэ профосмуотур уонна диспансеризация чэрчитинэн, төрүүр-ууһуур саастаах дьахталлар доруобуйаларын көрөллөрүн-истэллэрин таһынан, «Доруобай ийэлэр», «Дьахтар доруобуйатын десана» диэн анал аахсыйалары ыыталлар.
Муус устар 5 күнүгэр, Дьокуускай куорат Мэдиссиинэтин киинин дьахтар консултаассыйатыгар дьахталлары, ол быыһыгар элбэх оҕолоох ийэлэри төрүүр-ууһуур систиэмэлэригэр доброкачественнай үөскээһиннэр баалларын-суохтарын чинчийэллэр. Маныаха, мэдиссиинэ киинигэр аадырыстарынан сыстыбыт дьахталлар эрэ буолбакка, атын бэликилииникэлэртэн уонна улуустартан кэлэн көрдөрүнүөхтэрин сөп. Бу күҥҥэ дьахтар доруобуйатыгар туох эмит кэһиллии баарын буллахтарына, ол күн кини онкогинекологка тиийэн көрдөрүнүөн сөп, маныаха киниэхэ тустаах эмтээһини аныахтара уонна эбии туох чинчийиини ааһыахтааҕын туһунан сүбэлиэхтэрэ.
«Бу иккис аахсыйа. Олунньу ыйга хат буолууну былаанныырга аналлаах аахсыйаны ыыппыппыт, манна 56 дьахтар кэлэн көрдөрүммүтэ. Маны таһынан, Дьокуускай Мэдиссиинэтин киинин гинекологтара Ийэ буолаары сылдьар дьахталлар оскуолаларыгар лиэксийэлэри ыыппыттара, манна кинилэр бэйэлэрэ эрэ буолбакка, кэргэттэрэ эмиэ бааллара. Дьарыктарга чөл доруобуйалаах оҕону төрөтүү туһунан элбэх боппуруос киирбитэ», - диэн Дьокуускай куорат Мэдиссиинэтин киинин Доруобай дьиэ кэргэн харыстабылын уонна репродукциятын Киинин сэбиэдиссэйэ Вера Алиева кэпсиир.
Бу сылга Дьокуускайдааҕы Ийэ буолаары сылдьар дьахталлар Оскуолаларын дьарыга хас сэрэдэ ахсын ыытыллар. Манна ийэ буолаары сылдьар дьахталлары кытта быраастар, долгуйууну кыайыыга көмөлөһөр клиническэй психологтар, босуобуйа уонна оҕо төрүүрүгэр төлөбүр туһунан быһааран кэпсиир социальнай үлэһиттэр уонна хат дьахталлар үлэлэрин бырааптарын туһунан кэпсиир юристар кэпсэтэллэр.
Муус устар 7 күнүгэр, Аан дойдутааҕы доруобуйа күнүн чэрчитинэн, Саха сирин өрөспүүбүлүкэтээҕи клиническэй балыыһа Перинатальнай киинигэр «Ийэ уонна оҕо аһылыгын дневнигэ» диэн научнай, популярнай таһаарыы презентацията буолуоҕа. Бу аахсыйа оҕону эмиийдэтиини пропагандалыыр.
Муус устар 7 күнүгэр өрөспүүбүлүкэ мэдиссиинэтин тэрилтэлэрэ Ийэ Сылын уонна Аан дойдутааҕы Доруобуйа күнүн чэрчитинэн, Доруобуйа дьаарбаҥкаларын ыыталлар.
Ю.А. Гагарин аатынан култуура уонна аныгы ускуустуба Киинигэр Дьокуускай куорат №2 балыыһатын быраастара, оттон Марфа уонна Сергей Расторгуевтар ааттарынан СӨ Судаарыстыбаннай Циркэтигэр Дьокуускай куорат №1 бэликилииникэтин, «Прометей» атыы-эргиэн комплексыгар Дьокуускай куорат №3 бэликилииникэтин быраастара дьону-сэргэни көрүөхтэрэ.
Дьахтар аймах доруобуйатын көрүү-истии чэрчитинэн, мэдиссиинэ тэрилтэлэрэ оройуоннарга тиийиэхтэрэ, сотору кэминэн онкодесант Анаабыр оройуонугар тиийиэҕэ.
СӨ Ил Дарханын уонна Бырабыыталыстыбатын пресс-сулууспата сырдатыытыттан
Мария Васильева хаартыскаҕа түһэриилэрэ
