Бэҕэһээ, муус устар 6 күнүгэр, Арассыыйа ураты суоллаах-иистээх чаҕылхай бэлиитигэ Владимир Вольфович Жириновскай уһун ыарахан ыарыы кэнниттэн 75 сааһыгар олохтон туораата. Ол туһунан соһуччу иһитиннэрии дойду бары муннуктарыгар сатараата. Үгүстэр кини олохтоон барыытын “бүтүн эпоха барда” диэн сыаналыыллар.
Ол курдук, кини аныгы Арассыыйа бэлиитикэтин систиэмэтэ үөскээһинигэр сүҥкэн дьайыылаах Cудаарыстыстыбаннай Дуума ЛДПР фракциятын солбуллубат салайааччытын быһыытынан киэҥник биллэр. Кини Аан дойдуга уонна Арассыыйаҕа буолуохтаах быһыыны-майгыны өтө көрөр, сытыы өйдөөх, дириҥ билиилээх бэлиитик, оратор уонна полемист буолар.
РФ бэрэсидьиэнэ Владимир Путин: «Владимир Жириновскай хайа да түгэҥҥэ, мөккүөргэ Арассыыйа интэриэһин көмүскүүр дьиҥнээх патриот этэ. Онон биһиэхэ бу улахан сүтүк», - диэн этэн туран, улахан кутурҕанын биллэрдэ.
Бэлиитиги муус устар 8 күнүгэр Москуба Троекуровскай кылабыыһатыгар кистиэхтэрэ. Кинини бүтэһик суолугар атаарыы Сойуус Дьиэтин Колоннай саалатыгар буолуоҕа. Көмүллэр сценарийын кини номнуо 2014 cыллаахха “Говорит Москва”араадьыйа эпииригэр:
- Колонный зал, там будет прощание. Я думаю, тысячи, тысячи людей приедут со всей страны. Потом везут на Новодевичье кладбище. Там, где могила Ельцина, Ельцина уберём на федеральное кладбище, а я на Новодевичьем лягу. И поминки во всех ресторанах страны за счёт наших олигархов, чтобы могли сесть за стол несколько миллионов человек, - диэн кэпсээбит эбит. ("Царьград" ситимтэн)
Владимир Вольфович аатын Санкт-Петербург куорат Петроградскай оройуонун уулуссатыгар биэрэргэ этии киирбит. Кини муус устар 25 күнүгэр 76 сааһын туолуохтаах этэ.
Санатан этэр буоллахха, Владимир Жириновскай балыыһаҕа тыҥата 75% сүһүрүүлээх киирбит. Биллэн турар, Ковид-19 ыарыы түмүгэр. Кинини ИВЛ аппараакка холбообуттар, эмтии сатаабыттар даҕаны, бүөрэ мөлтөх уонна олунньуга инсуллаабыт буолан, өрүттүбэтэх.
Матырыйаал дойду сүрүн таһаарыыларыгар олоҕуран сурулунна
