Саха сирин бырабыыталыстыбата кэлэр икки сылга төрөөбүт тылы уонна литэрэтиирэни үөрэтэр кинигэ тиийбэт кыһалҕатын толору быһаарар соруктаах.
Ил Дархан Айсен Николаев дьаһалынан, «2020-2024 сс. Саха Өрөспүүбүлүкэтигэр судаарыстыбаннай уонна официальнай тыллары харыстааһын уонна сайыннарыы» судаарыстыбаннай бырагыраамаҕа үөрэтэр кинигэлэри уонна босуобуйалары толкуйдаан оҥорууга уонна тиэрдиигэ үп-харчы көрүллүбүтэ.
2021 сылга «Хотугу аҕыйах ахсааннаах норуоттар тылларынан литэрэтиирэ кэбиниэтэ», « «Саха уһуйаана» аччыгый бибилэтиэкэ, «Элбэх тылынан иитэр уһуйаан аччыгый бибилэтиэкэтэ» кэмпилиэктэр, ону кытары «Ил Дархан аудио бэлэҕэ» бырайыак кэмпилиэгэ (саха суруйааччыларын уонна бэйиэттэрин саҥарар кинигэлэрин хомуурунньуга) оҥоһуллубуттара. 10-11 кылаастарга саха тылын уонна литэрэтиирэтин, алын сүһүөххэ дьүкээгир тылын уонна литэрэтиирэ ааҕыытын босуобуйалара, учууталлар уонна иитээччилэр үөрэтэр босуобуйалара, тылдьыттар бэчээттэнэн тахсыбыттара. Национальнай «Айар» кинигэ кыһатын аан ситимигэр 1-тан 9-с кылааска диэри үөрэнэр кинигэлэр электроннай барыйааннара киирбиттэрэ.
2022 сылга 5-с кылааска туундаратааҕы дьүкээгир тылын, 1-гы уонна 5-с кылаастарга саха тылын уонна литэрэтиирэтин үөрэтэр босуобуйалар бэчээттэнэн тахсыахтара. Маны сэргэ 10-11 кылаастарга саха тылын учуобунньуктарын электроннай барыйааннарын бэлэмниэхтэрэ.
Оскуолалары уонна уһуйааннары «Саха тылын, литэрэтиирэтин уонна култууратын кэбиниэтэ» уонна «Оскуола иннинээҕи үөрэх «Кустук» бырагырааматын үөрэтэр матырыйааллара» кэмпилиэктэринэн хааччыйыахтара.
2022 c. балаҕан ыйын 1 күнүттэн дойду бары оскуолаларыгар 1-гы уонна 5-с кылаас үөрэнээччилэрин үөрэх саҥа халыыбынан үөрэтии (ФГОС) саҕаланыа. Онон үөрэтэр кинигэлэри ол саҥа ирдэбилгэ олоҕуран оҥороллор.
Сонун төрдө: CӨ Ил Дарханын уонна Бырабыыталыстыбатын пресс-сулууспата
