“Куораппытын тупсаҕай оҥоруохха” (“Формирование комфортной городской среды”) диэн куорат былаастарын тосхоллоро бүттүүн уопсастыбаннас хамсааһына буолар кэриҥнээх.
Ол курдук, нэһилиэнньэ туруорсуутунан куорат пааркатын тупсарыыга турунуулаах уонна айымньылаах үлэ барбыта.
Паарканы тупсарыы үлэлэрэ тэрилтэлэринэн сыhыарыллыбыт буолан, сүрдээх эппиэтинэстээхтик сыhыаннастылар.
Ааспыт сылларга Мииринэйдээҕи автомобильнай тырааныспар управлениета (МУАД) паарка иhин дьаарбайар аллеяларын, ыллыктарын бетонунан кутуталаата.
Куорат бүддьүөтүттэн, оҕо оонньуур былаһааккалара оҥоһулуннулар, араас павильоннар, карусель, фонтан баар буоллулар. Бу – киэҥ хабааннаах үлэ бастакы эрэ уочарата. Иккис уочарата ситэ илик.
Билигин куораты салгыы тупсарыы чэрчитинэн, култуурунай-сынньанар эбийиэктэри салгыы сайыннарыы барылга киирэн турар.
Тупсарыы барылынан сирдэттэххэ, Мииринэй киинэ эрэ буолбакка кытыы микрооройуоннар кэрэ көстүүлээх буолалларын туhугар үлэ ыытыллар. Холобур куорат кииниттэн хас да биэрэстэ ыраах, Иирэлээх үрэх уҥуор сытар Заречнайга микрооройуон көстүүтэ бөрүкүтэ суох. Ону тосту уларытар сорук турар. Манна геолог Бобков искибиэрин тутуу былааҥҥа киирэн турар.
Барылга чэрчилэммитинэн, оҕо оонньуур былаһаакката, сааһырбыт дьоҥҥо сынньанар ыскамыайкалардаах , чэбдигирдэр-эрчимирдэр көрүҥнэринэн дьарыктанар миэстэлэр, скейт-паарка, бэлисиэпиэттиир бетоннаммыт ыллык баар буолуохтаахтар.
Маны сэргэ, тупсарыы барылын чэрчитинэн, Мииринэй Советскай уулуссата сатыы дьон сылдьарыгар аналлаах буолуохтаах. Ол эбэтэр, манна массыынатын сырыытын тохтотуохтаахтар. Бу тула кэпсэтии барбыта ыраатта.
Бу үөһээ ааттаммыт эбийиэктэри оҥорууга, тупсарыыга бүттүүн норуот куоластааһынын сокуон-быраап иитинэн ирдииллэр.
Онон, муус устар 15 күнүттэн ыам ыйын 30 күнүгэр диэри, Мииринэй куоратын олохтоохторо интэриниэт нөҥүө бэйэлэрин сөпсөһөллөрүн дуу, сөпсөспөттөрүн дуу биллэриэхтээхтэр.
Станислав Алексеев. Мииринэй куорат. Ааптар хаартыскалара.
Матырыйаалбар «Мииринэй куората» муниципальнай тэриллии иһитиннэриилэригэр сигэнним.
