Алмаастаах кыраай киинигэр кыһыны атаарыы – биир саамай көрдөөх-нардаах, ырыалаах-тойуктаах, элбэх астаах-үөллээх бырааһынньык.
Кыһыны атаарыы кулун тутар ый 16 күнүгэр, эбиэт кэмигэр куорат пааркатыгар саҕаланыаҕа. Ким баҕарар сибиэһэй салгыҥҥа тото-хана аһыырын сөбүлүүр. Бырааһынньыктааччыларга анаан ас-үөл эрээттэригэр шашлык арааһыттан, сып-сылаас, арыылаах блинылар, расстегайдар, бубликтар, халаачыктар, пончиктар, төп-төгүрүк бирээнньиктэр, барыанньалаах бөрүөктэр, киһи айаҕар ууллар мип-минньигэс туортар, пирожнайдар, эклердар атыыланыахтара. Дьэ онтон, паарка килбэйэр киинигэр элбэх кыттааччылаах кэнсиэрт буолуоҕа.
Манна “Алмаас”, “Туой Хайа”(Арыылаах) , “Каскад”(Светлэй) култуура дьиэлэрин уус-уран кэллэктииптэрэ кыттыыны ылыахтара, ыллаан дьиэрэтиэхтэрэ, үҥкүүлээн тэлээриэхтэрэ. Оттон успуорду сэҥээрээччилэргэ анаан-минээн «Муус остуолба», киирэ көтөҕүү, сыттыктарынан бэрсиһии күрэхтэһиилэрэ ыытыллыахтара.
Нуучча норуотун былыргы үгэһинэн кырыа кыһын чуучулатын уматыы туома саамай көстүүлээх сиргэ буолуоҕа.
Станислав Алексеев. Мииринэй куората. Ааптар хаартыската.
