Алдан оройуонун баһылыгынан Александр Шестопалов буолла

Алдаҥҥа үс күннээх быыбар түмүктэннэ. Куоластааһын муус устар 15, 16, 17 күннэригэр ыытылынна. Баһылык буолар туһугар 4 хандьыдаат кииристэ. Быыбар кэмигэр туох эмэ сокуону кэһии туһунан үҥсүү киирбэтэ, барыта үрдүк таһымнаахтык тэриллэн, дьэҥкирдик ааста диэн оройуон быыбардыыр хамыыһыйата этэр.

Дьон кыттыыта мөлтөх - 25,85 % эрэ. Ол да буоллар, саҥа баһылык талылынна. "Биир ньыгыл Арассыыйа" баартыйаттан турбут Александр Викторович Шестопалов саамай элбэх 3895 куолаһы ылан (52,45 %) бигэтик кыайда. Кини өр сылларга "Лена" федеральнай суол дириэксийэтин салайбыт киһи быһыытынан биллэр.

Кыайтарбыт хандьыдааттар төһө куолаһы ылбыттарын көрүөҕүҥ: «Гражданская Платформа» баартыйаттан Евдокимов Ярослав Олегович – 186 (2,50%), ЛДПР баартыйаттан Стецов Игорь Владимирович - 462  (6,22 %), «Справедливая Россия – Патриоты – За правду» баартыйаттан Шкулепо Константин Анатольевич – 2529 (34,06 %).

Көстөрүн курдук, кыайыылаах киирсибит дьонун ырааҕынан куоһарбыт.

Шестопалов Александр Викторович туһунан:

1968 сыл балаҕан ыйын 13 күнүгэр  Чита уобалаһын Сивачи бөһүөлэгэр төрөөбүт.  

1994 сыллаахха Читатааҕы политехническэй институту  «Көтөҕөр-тиэйэр, дьиэ уонна суол тутар массыыналар уонна тэриллэр», 2003 сыллаахха Хабаровскайдааҕы судаарыстыбаннай техническэй университеты «Алларанан суоллар уонна аэродромнар» хайысхаларынан үөрэнэн бүтэрбит.

1994 сылтан 2011 сылга диэри «СӨ алларанан суолларын тутуу дириэксийэтэ» судаарыстыбаннай тэрилтэҕэ инженеринэн, онтон отдел салайааччытынан үлэлээбит.

2011 сыл олунньутуттан «Федеральнай алларанан суол ааҕыныстыбатын Уһук Илиҥҥи суолу тутуу регионнар икки ардыларынааҕы  дириэксийэтин хапытаалынай тутуу отделын салайааччытынан үлэлээбит, «Лена», «Колыма», «Вилюй» суоллар өрөмүөннэрин  көрөн-истэн ыыттарбыт.  

2015 сыл ыам ыйыттан - "Лена" суол управлениета федеральнай хааһыналаах тэрилтэ салайааччыта.